თბილისის მერიაში მთავრობის სხდომა მიმდინარეობს, სადაც საკრებულოს ოპოზიციონერ დეპუტატებს შესვლის საშუალებას არ აძლევენ. საკრებულოს ექვსმა დეპუტატმა დედაქალაქის მთავრობის სხდომაზე დასწრება მას შემდეგ გადაწყვიტა, რაც თბილისის მერმა, დავით ნარმანიამ, საკრებულოში მისვლაზე უარი განაცხადა. დეპუტატები ამბობენ, რომ რადგან ნარმანია არ მიდის მათთან, ისინი მივიდნენ მასთან პასუხების მისაღებად, თუმცა, უშედეგოდ.

საკრებულოს დამოუკიდებელი დეპუტატი, ალეკო ელისაშვილი ჟურნალისტებთან ამბობს, რომ მას კითხვები ჰქონდა მოსამართლე ნაზღაიძის ძმისთვის გადაცემულ კომპენსაციასთან დაკავშირებით:

"თბილისის მერი მილიონიან კორუფციულ სკანდალში თავით ფეხებამდე არის ჩართული და ჩვენ გვინდა მას ვკითხოთ ამასთან დაკავშირებით. თბილისის მოსახლეობას ნარმანიამ მოპარა მილიონი ლარი და ვიღაც ტიპს ჩაუდო ჯიბეში იმ დროს, როცა მოსახლეობას 100 და 200-ლარიან ერთჯერად დახმარებებზე არბენინებენ წინ და უკან".

ნაციონალური მოძრაობის წევრი, საკრებულოს დეპუტატი მარინა დათუკიშვილი მიიჩნევს, რომ დედაქალაქის მერს ეშინია: "ნარმანიას არ აქვს უფლება, გასცეს ბრძანება და აქ სრული მობილიზაცია გააკეთოს თავისი დაცვის სამსახურის. მას რისი ეშინია არ ვიცი, მას ეშინია საკრებულოს დეპუტატების და ხომ წარმოგიდგენიათ, თავისი ამომრჩევლების და ხალხის როგორ ეშინია".

რესპუბლიკური პარტიის ლიდერი, საკრებულოს დეპუტატი, ხათუნა სამნიძე ამბობს, რომ დავით ნარმანია აღნიშნული ქმედებით კანონს არღვევს, რადგან მას არ აქვს უფლება, დეპუტატებს აუკრძალოს მთავრობის სხდომაზე დასწრება.

თბილისის მერიის პრესსამსახურმა დეპუტატების ბრალდებებთან დაკავშირებით სპეციალური განცხადება გაავრცელა, სადაც წერია:

"გვინდა სრული პასუხისმგებლობით განვაცხადოთ, რომ ეს ინფორმაცია სიმართლეს არ შეესაბამება და ჩნდება საფუძვლიანი ეჭვი, რომ დეპუტატები ხელოვნურად ცდილობენ აჟიოტაჟის შექმნას. მოქმედი კანონმდებლობის შესაბამისად, ყველა დაინტერესებულ პირს აქვს უფლება დაესწროს დედაქალაქის მთავრობის სხდომას, თუ სხდომა წინასწარ არ არის გამოცხადებული დახურულად და შესაბამისად, საკრებულოს წევრებსაც მიეცათ სხდომაზე დასწრების შესაძლებლობა.

ამასთან, აღსანიშნავია, რომ დეპუტატებს თბილისის მერიისთვის სხდომაზე დასწრების მოთხოვნით წინასწარ არ მოუმართავთ, შესაბამისად, მას შემდეგ რაც ჩვენთვის ცნობილი გახდა, რომ საკრებულოს წევრებს სურვილი ჰქონდათ დასწრებოდნენ სხდომას, საკითხი შეთანხმდა მთავრობის წევრებთან და მათ ამის საშუალება მიეცათ.

მიუხედავად ამისა, დეპუტატები სხდომას არ დაესწრნენ, რაც კიდევ ერთხელ ადასტურებს, რომ მათი ქმედება მხოლოდ და მხოლოდ მედიისა და საზოგადოების წინაშე შოუს მოწყობას ემსახურებოდა".