რიონის ხეობაში ნამახვანჰესის კასკადის მშნებლობის მოწინააღმდეგეები ამბობენ, რომ კომპანია ENKA-ს თანამშრომლები პოლიციის მანქანებით გადაჰყავს. კომპანია ENKA-ში აღნიშნულ ინფორმაციას უარყოფენ. როგორც On.ge-ს განუცხადეს, ასობით თანამშრომელი ჰყავთ და პოლიციის მანქანებით მათი გადაყვანა შეუძლებელია.

აქციის ერთ-ერთი ორგანიზატორის, მარიტა მუსელიანის ინფორმაციით, თანამშრომლები ნამახვანში წასასვლელად ქუთაისში, ჯაჭვის ხიდზე შეიკრიბნენ.

"ჩვენი საპოლიციო ძალები იქცნენ ოფიციალურ გადამზიდ კომპანიად თვითონ კომპანია ENKA-სთვის. ვხედავთ, რომ გაიარა კოლონამ, პოლიციის პიკაპებს ვგულისხმობთ, რომლის უკანა სავარძლებზე ისხდნენ კომპანიის თანამშრომლები", — განაცხადა აქციის კიდევ ერთმა ორგანიზატორმა, ვარლამ გოლეთიანმა.

რიონის ხეობის აქტივისტები გუმათის დასახლებაში ENKA-ს ბაზასთან არიან შეკრებილნი. ისინი ცდილობენ, კომპანიის მანქანებსა და თანამშრომლებს გადაადგილებაში ხელი შეუშალონ.

გუმათჰესთან კი ხმაური იყო 30 მაისის ღამესაც. ჰესის მშენებლობის მოწინააღმდეგეები ადგილზე აღმართულ რკინის ბარიკადებზე აბრახუნებდნენ და ჯებირების მიღმა გასვლას ცდილობდნენ.

ისინი ტყის ბილიკით შეეცადნენ ხეობაში მოხვედრას, თუმცა სამართალდამცავებმა მათ ამის საშუალება არ მისცეს. სამართალდამცავები აქტივისტებს დაედევნენ და ბარიკადებს მიღმა მოაბრუნეს. პროტესტის ერთ-ერთი ლიდერის, ვარლამ გოლეთიანის თქმით, ტყის ბილიკით გადასვლას 50-მდე ადამიანი ცდილობდა. მისივე თქმით, ეს ერთგვარი სიმბოლური აქტი იყო.

გუმათჰესთან პოლიცია მას შემდეგ არის განლაგებული, რაც სოფელ ნამოხვანში ხეობის აქტივისტებს კარვები დაუშალეს და იქ დაბრუნების საშუალებას არ აძლევენ. რკინის ბარიკადებში მხოლოდ ადგილობრივ მოსახლეობას ატარებენ, თუმცა აქციის მონაწილეებს სახლში წასასვლელად შემოვლითი გზის გამოყენება უწევთ. ბარიკადებს პოლიცია ამაგრებს, რომელთან რაოდენობაც საღამოობით იზრდება.