პარლამენტმა დღეს პარლამენტის გამოკლებული წევრების ადგილმონაცვლე დეპუტატების უფლებამოსილება ცნო. ირაკლი სესიაშვილს ქართული ოცნებიდან გელა სამხარაული შეცვლის, მარიამ ქვრივიშვილს ხათუნა კვიციანი. პარტია გირჩის ყოფილი დეპუტატის, სალომე მუჯირის შემცვლელი კი, ალექსანდრე რაქვიაშვილი იქნება.

სესიაშვილს, ქვრივიშვილსა და მუჯირს დეპუტატის უფლებამოსილება ვადამდე ადრე 25 მაისს შეუწყდათ.

ქართული ოცნების დეპუტატებმა აღმასრულებელ ხელისუფლებაში გადაინაცვლეს. სესიაშვილი თავდაცვისა და უსაფრთხოების საკითხებში პრემიერმინისტრის მრჩევლად დაინიშნა, ხოლო ქვრივიშვილი — ეკონომიკის მინისტრის მოადგილედ.

რაც შეეხება სალომე მუჯირს, ის პარლამენტში გირჩის პროპორციული სიით მოხვდა. გირჩი პარტიულ სიებში გენდერულ კვოტირებას არ ეთანხმება და აცხადებდა, რომ სიაში ქალებს მხოლოდ ფორმალურად ჩასვამდა. პარლამენტში მოხვედრის შემდეგ გირჩმა პარტიული სიის ნაწილი ჩახსნა, მუჯირმა კი მანდატზე უარი თქვა, რის შემდეგაც მუჯირის ადგილმონაცვლე ალექსანდრე რაქვიაშვილი გახდა.

პარტიის ლიდერის, იაგო ხვიჩიას თქმით, სალომე მუჯირი მათი მეგობარია, რომელიც მიზნის მიღწევაში დაეხმარათ, რათა "იდიოტური" რეგულირებისთვის აევლოთ გვერდი.