გირჩი — მეტი თავისუფლება ავრცელებს სტერეოტიპულ მესიჯს, რომ "რადიკალ" ფემინისტებს სუსტი კაცები მოსწონთ. პარტიის ოფიციალურ Facebook გვერდზე აიტვირთა ფოტო, სადაც ჩანს ქალი ჭიქით, გვერდით კი არის წარწერა — "მე მინდა მთავრობა იყოს ისეთი, როგორი კაცებიც მოსწონთ რადიკალ ფემინისტებს... იმდენად სუსტი, რომ მხოლოდ ბაზისურ ფუნქციებს ასრულებდეს და არაფერ ზედმეტს".

ფოტო: გირჩი — მეტი თავისუფლება

On.ge დაუკავშირდა პარტიის პრესსამსახურს კითხვით, რა მიზნით გამოქვეყნდა ფოტო ოფიციალურ გვერდზე. პრესსამსახურმა სოციალური მედიის მენეჯერთან გადაგვამისამართა, რომელმაც გვითხრა, რომ ეს არის ხუმრობა. მისი აზრით, "რადიკალი ფემინისტები" მიიჩნევენ, რომ კაცებს უფლებები არ უნდა ჰქონდეთ.

"ხუმრობაა ჩვეულებრივი და შარჟია იმ ადამიანებზე, რომლებსაც ძალიან რადიკალური შეხედულებები აქვთ, კონკრეტულად, რადიკალ ფემინისტებზე და მიიჩნევენ, რომ კაცს არანაირი უფლებები არ აქვს. მაგალითად, მესამე ტალღის ფემინისტებს ძალიან რადიკალური შეხედულებები აქვთ ხოლმე საზოგადოებრივ საკითხებზე, ქალის და კაცის როლთან მიმართებით. შესაბამისად, ამაზე იყო შარჟი, რომელიც ძალიან გავრცელებულია ხოლმე ლიბერტარიანელებში, უბრალოდ გადმოვაქართულე მე და ამ ფორმით დავდე", — გვითხრა მარიამ ჩალათაშვილმა.

გირჩი — მეტი თავისუფლების სოციალური მედიის მენეჯერს, ასევე, ვკითხეთ, ხომ არ ფიქრობს, რომ ეს პოსტი სტერეოტიპულია, რაზეც გვიპასუხა:

"ხუმრობაში ზოგადად რაციონალურობის მოთხოვნა ცოტა უცნაური მგონია. ასევე, ინგლისურ ენაზე რაც იყო, იმაში მხოლოდ ფემინისტები ეწერა, მაგრამ მე "რადიკალი" მივამატე, რადგან არ მივიჩნევ, რომ მაგალითად, პირველი ტალღის ფემინისტებს ასეთი კაცები შეიძლება მოსწონდეთ. სპეციალურად არის პოსტერზე დართული "რადიკალი", რომ არ მომხდარიყო ეგ სტერეოტიპული წარმოდგენა", — აცხადებს ის.

ცნობისთვის, ფემინიზმი ქალისა და კაცის თანასწორობას ქადაგებს. ფემინისტები არიან ჩვეულებრივი ადამიანები, რომლებიც თანასწორობისთვის იბრძვიან, ხანდახან განსხვავებული ფორმებით. მათი გემოვნებაც განსხვავებულია — ზოგს "ძლიერი" კაცები მოსწონს, ზოგს "სუსტები", ზოგს კი შეიძლება საერთოდ არ მოსწონდეს კაცები, არც "ძლიერები" და არც "სუსტები".