სოციალური სამართლიანობის ცენტრის შეფასებით, ამნისტიის შესახებ ქართული ოცნების მიერ წარდგენილი კანონპროექტი "არის ზედმეტად ზოგადი და ფართო". ორგანიზაციაში აცხადებენ, რომ განსაკუთრებით პრობლემურია ამნისტიის გავრცელება იმ საქმეებზე, რომლებზეც გამოძიება შესაძლოა დაიწყოს მომავალში, ასევე, დაზარალებულების გამორიცხვა პროცესიდან.

"განსაკუთრებით პრობლემურია კანონპროექტის ჩანაწერი, რომლითაც ამნისტირებული იქნება 19-21 ივნისის მოვლენებთან დაკავშირებული ისეთი დანაშაულებიც, რომელზეც მომავალში დაიწყება გამოძიება. შესაბამისად, პარლამენტი ამნისტიას აცხადებს ჯერ კიდევ უცნობ, გამოუკვლეველ ქმედებებზე [...]

შემაშფოთებელია ისიც, რომ კანონპროექტი მინიმალურადაც არ ითვალისწინებს ამ მოვლენების დროს დაზარალებულთა ინტერესებს და მთლიანად გამორიცხავს მათი თანხმობის საჭიროებას ამნისტიის პროცესიდან", — ვკითხულობთ ორგანიზაციის მიერ გავრცელებულ განცხადებაში.

გარდა ამისა, ორგანიზაციის შეფასებით, ქართული ოცნების მიერ წარმოდგენილი კანონპროექტი სრულად არ აზღვევს ამნისტიის გავრცელებას ისეთ დანაშაულებებზე, რომლებიც უკავშირდება წამებას, არაადამიანური და ღირსებისშემლახავი მოპყრობას.

"პრობლემურია, რომ ამნისტიის შემოთავაზებული რედაქცია წამების, არაადამიანური ან/და ღირსების შემლახავი მოპყრობის ან დასჯის აკრძალვის აბსოლუტურ უფლებას სათანადოდ არ იცავს და სრულად არ აზღვევს იმ დანაშაულებზე ამნისტიის არ გავრცელებას, რომელიც აღნიშნული უფლების ხელყოფას შეიძლება უკავშირდებოდეს", — აცხადებენ ორგანიზაციაში.

სოციალური სამართლიანობის ცენტრი ყურადღებას ამახვილებს ამნისტიის აქტის პოლიტიკურ კონტექსტზეც. ორგანიზაციაში აცხადებენ, რომ იგი უნდა ეფუძნებოდეს არა ვიწრო პოლიტიკურ ინტერესებს, არამედ ფართო საზოგადოებრივ კონსენსუსს.

"ილუზორული და არარეალისტურია, რომ ამნისტია ხელს შეუწყობს ქვეყანაში პოლარიზების შემცირებას და პოლიტიკური ველის კონსოლიდაციას, რადგან ამ დრომდე არ შეცვლილა პოლიტიკური ლიდერების პოზიციონირება და დღემდე ვისმენთ ურთიერთმტრობასა და ანტაგონიზმე დაფუძნებულ განცხადებებს როგორც ხელისუფლების, ისე ოპოზიციის ლიდერებისგან", — ვკითხულობთ ორგანიზაციის განცხადებაში.

ევროპული საბჭოს პრეზიდენტის, შარლ მიშელის ინიციატივით შემქნილი დოკუმენტის იმ ნაწილს, სადაც 20 ივნისის საქმეების ამნისტირებაზე საუბარი, პოლიტიკოსები განსხვავებული ინტერპრეტაციით კითხულობენ. ამ დროისთვის პარლამენტში კანონპროექტის ორი — ქართული ოცნებისა და ოპოზიციის ვერსიებია დარეგისტრირებული. სავარაუდოდ მომდევნო კვირიდან, მას შემდეგ რაც საკოორდინაციო საბჭოს მიერ გამოცხადებული უქმე დღეები ჩაივლის, საკანონმდებლო ორგანოში კანონპროექტების განხილვა დაიწყება.

გაიგეთ მეტი: