knews.ge-ის ინფორმაციით, თელავის რაიონის სოფელ ნაფარეულში მცხოვრები ფერმერი ქეთევან ტურაშვილი მამალი ფუტკრის რძის წარმოებას გეგმავს, რომლისგანაც მისივე თქმით, უშვილობის სამკურნალო ბილოგიურად აქტიური პროდუქტი მიიღება.

გამოცემის ცნობით, ქეთევან ტურაშვილს სოფელ ნაფარეულში 40 სკა ფუტკარი ჰყავს. აპრილიდან იგი მამალი ფუტკრის რძის წარმოებას დაიწყებს. გამოცემასთან საუბრისას, მეფუტკრე აღნიშნავს, რომ პროდუქტზე დიდი მოთხოვნაა და 1 გრამს 3 ლარად გაყიდის.

"მამალ ფუტკარს ოჯახში ყველაზე მნიშვნელოვანი როლი აკისრია - შთამომავლობის გაგრძელება, ამიტომ მასში მამაკაცური ენერგია მთელი მისი ძლიერებით არის წარმოდგენილი. მამალ ფუტკრებს ოჯახში აქვთ კვების განსაკუთრებული რაციონი, რომელიც თავისი კვებითი ღირებულებით სადედე ფუტკრის რძესაც კი აჭარბებს. მამალი ფუტკრის რძეზე მოთხოვნა სულ უფრო და უფრო იზრდება. ძალიან ბევრ ადამიანს სურს მამალი ფუტკრის რძის შეძენა, ამიტომ გადავწყვიტე მისი წარმოება. ვფიქრობ, რომ პირველ ეტაპზე 2 კილოგრამს გავყიდი. ერთი გრამის ღირებულება 3 ლარი იქნება".

მეფუტკრე განმარტავს, რომ მამალი ფუტკრის ჰომოგენატის 50%–ის შემადგენლობაში შედის იგივე კომპონენტები, რომლისგანაც შედგება ფუტკრის რძე, ბუნებრივი ნივთიერებების დანარჩენ 50%-ს კი გააჩნია უნიკალური თვისებები, რაც მზა პროდუქტს განუმეორებელ ხარისხს ანიჭებს.

knews.ge-სთან ინტერვიუში ფერმერი განმარტავს, რომ მამალი ფუტკრის ჰომოგენატი ადამიანის ორგანიზმისთვის აუცილებელი ცილების გარდა შეიცავს: ამინომჟავებს, ვიტამინებს, ფერმენტებს, მიკროელემენტებსა და ა.შ. მისივე თქმით, ის აქტიურად გამოიყენება უშვილობის მკურნალობისთვის როგორც ქალებისთვის, ასევე მამაკაცებისთვის.

გამოცემასთან საუბარში, ფერმერი ირწმუნება, რომ მის მიერ დამზადებული წამლები განსაკუთრებულია, რადგან პრეპარატების შემადგენლობაში ქიმიური ნივთიერებები არ შედის.

ქეთევან ტურაშვილი კახეთის მეფუტკრეთა ასოციაციის წევრია. ის წარმოების კიდევ უფრო გაფართოებას და მეფუტკრეობაში სიახლეების დანერგვას გეგმავს.

ქეთევან ტურაშვილის საქმიანობის შესახებ, სრულად შეგიძლიათ წაიკითხოთ აქ.

ფოტო: knews.ge

ფოტო: knews.ge

ფოტო: knews.ge