პარტია მოქალაქეების გენერალური მდივანი, ლევან იოსელიანი იზიარებს იმ მოსაზრებას, რომ პარლამენტის თავმჯდომარის პოსტზე კახა კუჭავა უფრო ნეიტრალური ფიგურა იქნება. ამის შესახებ მან პარლმენტში ჟურნალისტებთან ისაუბრა.

"რაც შეეხება ამ ცვლილების მიზანს, როგორც ბევრი თქვენგანისთვის, ჩემთვისაც მოულოდნელი და გაუგებარიც იყო. თუმცა არგუმენტს, რომ ბატონი კახა კუჭავა არის უფრო ნეიტრალური და დაბალანსებული პოლიტიკური ფიგურა, ვთქვათ, ვიდრე ეს იყო მისი წინამორბედი, ამ არგუმენტს ვიზიარებ. [...] კუჭავა არის უფრო დაბალანსებული ადამიანი, ვისი პოლიტიკური წარსული ბევრად უფრო მიუკერძოებელია, შეიძლება ითქვას, პოლიტიკური განცხადებების თვალსაზრისით", — აღნიშნა იოსელიანმა.

არჩილ თალაკვაძემ პარლამენტის თავმჯდომარის თანამდებობა შაბათს, 24 აპრილს დატოვა. ამის მიზეზი, მისი თქმით, ისაა, რომ მოლაპარაკებებზე მხარეს წარმოადგენდა, ხოლო პარლამენტის სპიკერი "ნეიტრალური უნდა იყოს".