პრეზიდენტმა გიორგი მარგველაშვილმა რუსთავი 2-ზე გადაცემა არჩევანში, 13 თებერვალს პროკურატურის მიერ გავრცელებულ განცხადებასთან დაკავშირებით უპასუხა კითხვებს.

კერძოდ, განცხადებაში ნახსენები იყო "მაღალი იერარქიის სასულიერო პირის მკვლელობის მომზადება", თუმცა მოგვიანებით ცნობილი გახდა, რომ ოფიციალურ ბრალდებაში სასულიერო პირზე საუბარი არ არის, რაც პროკურატურის განმარტებით, გამოძიებით დადგინდა:

"როდესაც ხდება პოლიტიკოსების პროკურორობა და პროკურორების პოლიტიკოსობა, შეცდომები გარდაუვალია. მე ახლა არცერთი ვერსიის განვითარება არ მინდა, რატომ მოხდა შეცდომები, რის გამო, აქ რა იყო, არ არის დღეს ეს ჩემთვის საინტერესო. ჩემთვის საინტერესოა, რომ ყველა დავუბრუნდეთ ჩვენს როლს, ვისაც რა გვაქვს საკეთებელი და რაშიც გვიხდიან ხელფასს. პროკურორებს ხელფასს უხდიან საქმის გამოძიებაში, პოლიტიკოსებს უხდიან რომ მათ პოლიტიკური განცხადებები აკეთონ".