ორი წელი გავიდა Avengers: Endgame-ის (შურისმაძიებლები: დასასრული) მსოფლიო პრემიერიდან, როცა მილიონობით ფანი საყვარელ სუპერგმირს — ტონი სტარკს გამოემშვიდობა.

"მე... ვარ.. რკინის კაცი" — ამ ფრაზის შემდეგ მაყურებლის ნაწილი კმაყოფილი დარჩა, როგორ გმირულადაც დასრულდა რობერტ დაუნ უმცროსის პერსონაჟის თერთმეტწლიანი კინომოგზაურობა. თუმცა, ყველა როდი შეეგუა ამას ასე მარტივად.

ანონიმური ფანების ჯგუფმა ფული შეაგროვა და ლოს-ანჯელესში აღმართული ბილბორდით მარველის კინოსტუდიას სთხოვენ, რომ ტონი სტარკი გააცოცხლონ.

მიუხედავად ფანების მცდელობისა, ჯერ არანაირი ოფიციალური ინფორმაცია არ არსებობს იმის შესახებ, რომ მარველი მსგავს რამეს გეგმავს. სანაცვლოდ მალე გამოვა ამავე სამყაროს გმირებზე გადაღებული ისეთი ფილმები, როგორიცაა, მაგალითად, Black Widow და ამჟამად ასევე გადის სერიალი Falcon and the Winter Soldier.

"ყველაფერი გავაკეთე, რაც ამ როლის შესრულებისას შემეძლო, რომ გამეკეთებინა. ახლა დროა, სხვა საქმეებსაც მივხედო. როცა შუახნის ასაკში ხარ, ხშირად იყურები წარსულში და აცნობიერებ, რომ ეს ყველაფერი მოგზაურობის ერთი ნაწილი იყო, რომელიც დასრულდა. იღბლიანი და უზომოდ მადლიერი ვარ, რომ აქამდე მოვედი", — განაცხადა რობერტ დაუნ უმცროსმა ერთ-ერთ ინტერვიუში.