მოდის ფრანგულ ბრენდსა და ჰუავეის შორის ლოგოს თაობაზე არსებული სასამართლო დავა ჰუავეის გამარჯვებით დასრულდა. ამის შესახებ გადაწყვეტილება ევროსასამართლომ 21 აპრილს მიიღო.

შანელსა და ჰუავეის შორის დაპირისპირება 2017 წელს დაიწყო, როდესაც ჰუავეიმ ახალი ლოგო წარადგინა და სავაჭრო ნიშნის დარეგისტრირება გადაწყვიტა. ამან შანელის უკმაყოფილება გამოიწვია, რადგან, კომპანიის განცხადებით, ჰუავეის ლოგო ფრანგული ბრენდის ლოგოს ჰგავდა.

მარცხნიდან მარჯვნივ: ჰუავეისა და შანელის ლოგოები

ევროპის ინტელექტუალური საკუთრების სააგენტომ მიიჩნია, რომ ლოგოები ერთმანეთს არ ჰგავდა, შესაბამისად, მომხმარებლებში დაბნეულობას ვერ გამოიწვევდა. ამის შემდეგ შანელმა მართლმსაჯულების ევროპულ სასამართლოს მიმართა, თუმცა ბრენდის მოთხოვნა არც ამ შემთხვევაში დაკმაყოფილდა.

სასამართლომ აღნიშნა, რომ ლოგოების შედარება იმ სახით უნდა მომხდარიყო, რა სახითაც მათ კომპანიები არეგისტრირებენ და არა — სხვა კუთხითა თუ რაკურსით.

"შანელის ლოგოს მომრგვალებული ფორმა, უფრო სქელი კონტურები და ჰორიზონტალური განლაგება აქვს, ხოლო ჰუავეის ლოგო ვერტიკალურია. შესაბამისად, სასამართლო ადგენს, რომ ლოგოები ერთმანეთისგან განსხვავებულია". — განაცხადა სასამართლომ.

სასამართლოს აღნიშნული გადაწყვეტილება გასაჩივრებას ექვემდებარება, თუმცა შანელის წარმომადგენლებს ამის შესახებ კომენტარი ჯერჯერობით არ გაუკეთებიათ.