ლეიბორისტული პარტიის ლიდერი, შალვა ნათელაშვილი ოპოზიციონერი დეპუტატების მიმართ, რომლებმაც შეთანხმების დოკუმენტს ხელი მოაწერეს, გულისტკივილს გამოხატავს. მისი თქმით, გუშინ მათ პოლიტიკა დაასრულეს.

"მე გულისტკივილს გამოვხატავ ჩემი ძვირფასი კოლეგების გამოც, რომლებმაც გუშინ დაამთავრეს პოლიტიკა იმ ხელმოწერის შედეგად, რაც ჩემთვის ტრაგიკულია, რადგან ეს თვეები, განსაკუთრებით, მაქსიმალურად ვეფერებოდით ერთმანეთს და შედეგად საქართველო დავაბრუნეთ საერთაშორისო რადარებზე, მსოფლიო კვლავ ავალაპარაკეთ ჩვენი ერთიანობით და ყველა იმ დადებითი ელემენტით, რომელიც ჩამქვრალი იყო და მაინც ვერ ავიცილეთ არასასიამოვნო შედეგი, რომელიც კატასტროფა არ არის, რადგან ძირითადი პოლიტიკური ძალები ამ წუთისათვის არ შედიან", — თქვა მან სპეციალურ ბრიფინგზე.

ამის გარდა, ნათელაშვილმა საქართველოში ამერიკის ელჩზე, კელი დეგნანზეც ისაუბრა. მისი თქმით, გუშინ "რუსი ოლიგარქის, ბიძინა ივანიშვილის გადასარჩენად სპეცოპერაცია განხორციელდა", რომელსაც დეგნანი ხელმძღვანელობდა. ნათელაშვილის განცხადებით, გუშინდელმა დღემ კიდევ ერთხელ დაარწმუნა, რომ საქართველოს "სტრატეგიული პარტნიორი და მოკავშირე არ ჰყავს".

"ტრამპი თეთრ სახლში დასვა პუტინმა რუსული ფულებით, ხოლო ტრამპმა დანიშნა მთელს მსოფლიოსა და განსაკუთრებით, ჩვენს რეგიონში რუსეთისა და ოკუპანტებისადმი ლოიალობით განწყობილი დიპლომატები. მე მოვუწოდებ აშშ-ს ახალ ადმინისტრაციას, პრეზიდენტ ბაიდენს, დროზე გაწმინდე ამერიკული დიპლომატია და სახელმწიფო დეპარტამენტი პროტრამპისტული ელემენტებისგან. ტრამპიზმი ნიშნავს პროპუტინიზმს, აქაც, რუსეთსა და ამერიკაშიც", — თქვა მან.

19 აპრილს ევროპული საბჭოს პრეზიდენტის, შარლ მიშელის ახალ დოკუმენტს შვიდმა პოლიტიკურმა პარტიამ და ორმა დამოუკიდებელმა დეპუტატმა მოაწერა ხელი. ხელმოწერის ცერემონია პრეზიდენტის სასახლეში გაიმართა. ხელმოწერის ცერემონიას ონლაინ დაესწრო შარლ მიშელიც.

ამ დროის მონაცემებით, დოკუმენტს ხელს აწერენ: ქართული ოცნება, ლელო, სრატეგია აღმაშენებელი, ორივე გირჩი, რესპუბლიკური პარტია, ასევე, ინდივიდუალურად აწერენ ხელს ნაციონალური მოძრაობის ერთ-ერთი ლიდერი, სალომე სამადაშვილი და ევროპული საქართველოს ყოფილი თავმჯდომარე, დავით ბაქრაძე. ამ ორი პარტიის სხვა წარმომადგენლები პრეზიდენტის ადმინისტრაციაში ამ დროისთვის არ იმყოფებიან. 20 აპრილს ხელი მოაწერა ევროპული საქართველოს ერთ-ერთმა წევრმა, არმაზ ახვლედიანმაც.

ახალ დოკუმენტში საუბარია პოლიტპატიმრებზეც. კერძოდ, საუბარია იმაზე, რომ დოკუმენტის ხელმოწერიდან 1 კვირის განმავლობაში ორ შემთხვევაში, იგულისხმება ნიკა მელიასა და გიორგი რურუას საქმეები, იქნება ამნისტია ან სხვა ნაბიჯი, რომელსაც ანალოგიური შედეგი ექნება. საუბარია ამნისტიის კანონზეც, რომელიც 2019 წლის 20 ივნისის აქციებს ეხება. პარტიები ცვლილებების მხარდასაჭერად პარლამენტში უნდა შევიდნენ.

გარდა ამისა, დოკუმენტში საუბარია საარჩევნო რეფორმაზე, სადაც ვადამდელ არჩევნებთან დაკავშირებით ქართული ოცნების წინადადება გაზიარებულია, თუმცა ნაცვლად 40%-სა, შემოთავაზებულია 43%. კერძოდ, ვადამდელი არჩევნები ჩატარდება 2022 წელს, თუ 2021 წლის თვითმმართველობის არჩევნებში მმართველი პარტია 43%-ზე ნაკლებ პროპორციულ ხმას აიღებს.

დოკუმენტი მოიცავს სასამართლო რეფორმას, პარლამენტში ძალაუფლების გადანაწილებასა და მომავალ არჩევნებსაც.

ამავე თემაზე:

• რა წერია შარლ მიშელის ახალ დოკუმენტში და რაზე თანხმდება ოპოზიცია — დეტალები