პარტია ლელოს თავმჯდომარე, მამუკა ხაზარაძის თქმით, მიუხედავად იმისა რომ ნაციონალური მოძრაობისგან იგი კომპრომისს ელოდა, ესმის, რომ ლიდერის პატიმრობის პირობებში პარტიამ ეს ნაბიჯი არ გადადგა.

"ნაციონალურ მოძრაობას აქვს თავისი პრინციპები. მე ყველა ადამიანის გადაწყვეტილებას პატივს ვცემ, ეს მათი გადაწყვეტილებაა. მე ვფიქრობ, რომ დღეს ყველას უნდა გადაედგა ნაბიჯი კომპრომისისკენ, თუმცა მესმის, როცა პარტიის ლიდერი არის ციხეში, რთულია ამ გადაწყვეტილების მიღება. მე ვფიქრობ, რომ ეს საკითხი ძალიან მალე გადაწყდება", — განაცხადა მამუკა ხაზარაძემ შეთანხმების დოკუმენტზე ხელმოწერის ცერემონიის შემდეგ.

კითხვაზე, როდის შევა პარლამენტში, ხაზარაძემ ასე უპასუხა:

"როგორც კი მელიას საკითხი გადაწყდება, ჩვენ შევალთ პარლამენტში".

ქართულმა ოცნებამ და ოპოზიციის ნაწილმა შეთანხმების დოკუმენტს ხელი მოაწერეს.

ხელმომწერებს შორის არ არის ნაციონალური მოძრაობა. თუმცა, ენმ-სგან დამოუკიდებლად შეთანხმებას შეუერთდა პარტიის პოლიტსაბჭოს წევრი სალომე სამადაშვილი. ასევე, ენმ — ძალა ერთობაშიას ბლოკის წევრი რესპუბლიკური პარტიის თავმჯდომარე, ხათუნა სამნიძე.

დოკუმენტზე ხელმოწერის შემდეგ სალომე სამადაშვილმა საკუთარ ფეისბუქგვერდზე დაწერა რომ "სასაცილოდ და ინფანტილურად გამოიყურება ენმ-ის პოზიცია" რომ მელიას გამოშვების გარეშე არ აწერენ ხელს დოკუმენტზე. On.ge-სთან საუბრისას კი განაცხადა, რომ პარტიის პოლიტიკურ საქმიანობაში მონაწილეობას აღარ მიიღებს. მისი თქმით იგი პარტიას არც პარლამენტში წარმოადგენს.

ენმ-ს წევრები აცხადებენ, რომ პარტიის თავმჯდომარის, ნიკა მელიას გათავისუფლებამდე შეთანხმების დოკუმენტს ხელს არ მოაწერენ.

გაიგეთ მეტი: