ახალქალაქის, კუმურდოს და კარის მიტროპოლიტი ნიკოლოზის განცხადებით, ისეთ დროში ცხოვრობენ, რომ "ძნელია, ასე სტერილურად" არ იყვნენ პოლიტიკურები. ამის შესახებ მან რუსთავი 2-ში ღამის კურიერის ეთერში ისაუბრა და ასე უპასუხა ჟურნალისტის კითხვას — "პოლიტიკური გავლენები ქართულ ეკლესიაში არსებობს თუ არ არსებობს?"

"ძნელია — ისეთ დროში ვცხოვრობთ, რომ ასე სტერილურად არ ვიყოთ პოლიტიკური. ჩემი დღევანდელი გამოსვლაც პოლიტიკური შეიძლება იყოს, მაგრამ არ მინდა ეს ასე რომ იყოს, უბრალოდ, რა გავაკეთოთ? შეუძლებელია ასე გამიჯვნა. ამიტომ, ალბათ, არსებობს, რა თქმა უნდა. პოლიტიკური დატვირთვა ეკლესიას აქვს, გავლენიანი ინსტიტუტია და გასაგებია, ხომ. ჩვენ არ ვაპირებთ ხელისუფლებაში მოსვლას", — თქვა მან.

მეუფე ნიკოლოზის თქმით, სასულიერო პირები ინდივიდები არიან, რომლებიც საკუთარ დამოუკიდებელ აზრს გამოთქვამენ და ხშირად ეს აზრები პოლიტიკური გავლენებისგან თავისუფალი არ არის. მისი მტკიცებით, როცა სინოდი იკრიბება და გადაწყვეტილებებს იღებს, მაქსიმალურად ცდილობენ, რომ პოლიტიკური შეფასებები არ იყოს.