საქართველოს საგარეო საქმეთა მინისტრის განცხადებით, ერთიანობა მთელი ქვეყნის ვალია იმ ადამიანების ხსოვნის წინაშე, ვინც თავისუფლებისთვის თავი გასწირა. ამის შესახებ დავით ზალკალიანმა 9 აპრილის მემორიალთან ისაუბრა.

"9 აპრილი მნიშვნელოვანი დღეა საქართველოში. დღე, რომელმაც დასაბამი მისცა ბრძოლას თავისუფლებისთვის და დამოუკიდებლობისთვის. სამწუხაროდ, ეს ბრძოლა ჯერ დასრულებული არ არის, რადგანაც საქართველო კვლავ ოკუპირებულია და და ჩვენი ბრძოლა გრძელდება, იმისთვის, რომ საქართველო იყოს სრულფასოვნად ინტეგრირებული ევროპულ და ევროატლანტიკურ ოჯახში. მართლაც ფასდაუდებელია იმ ადამიანების წვლილი, ვინც თავი გასწირა და ვინც შეეწირა ამ ბრძოლას და ჩვენი ვალია, მთლიანად ქვეყნის, ჩვენი ერის ვალი მათი ხსოვნის წინაშე, რომ ვიყოთ გაერთიანებული, ვიყოთ კონსოლიდირებული. როგორც არასდროს, ისე იყო კონსოლიდირებული ჩვენი ერი 9 აპრილს და საქართველოს ისტორიაში, მართლაც, იშვიათია ისეთი მომენტები, როდესაც ერი ასეთი გაერთიანებულია", — თქვა მან.

მინისტრმა აღნიშნა, რომ დღეს გვაკლია ერთობა და კონსოლიდაცია იმ გამოწვევების წინაშე, რომელიც ქვეყანას აქვს — ოკუპაცია, პანდემიასთან ბრძოლა, ეკონომიკის გაჯანსაღება, ახალ გეოპოლიტიკურ რეალობასთან გამკლავება.

9 აპრილის ტრაგედიიდან 32 წელი გავიდა. 1989 წლის 4 აპრილს სეპარატიზმისა და მოსკოვის ანტიქართული პოლიტიკის წინააღმდეგ მშვიდობიანი აქციები დაიწყო, რომელიც მალევე დამოუკიდებლობის მოთხოვნაში გადაიზარდა. 9 აპრილს, გამთენიას რუსულმა არმიამ რუსთაველის გამზირზე შეკრებილი ხალხის დარბევა დაიწყო. მშვიდობიან, ხელაწეულ დემონსტრანტებს მომწამლავი ქიმიური საშუალებები, ცეცხლსასროლი იარაღი, სასანგრე ბარები, ჯავშანტრანსპორტიორები და ტანკები დაუპირისპირეს.

სადამსჯელო ღონისძიებებს 21 ადამიანის სიცოცხლე ემსხვერპლა, მათგან 17 ქალია. ქალებს შორის ყველაზე უმცროსები 16 წლის უფროსი კი 70 წლის. იმდროინდელ ბეჭდურ გამოცემებთან ინტერვიუში აქციის მონაწილეები იხსენებენ, რომ ჯარისკაცები ყველაზე აგრესიულები ორსულების და მოხუცების მიმართ იყვნენ.

1991 წლის 9 აპრილს კი, მოსახლეობის ნებაზე დაყრდნობითა და პირველი რესპუბლიკის დამოუკიდებლობის აქტის საფუძველზე უზენაესმა საბჭომ საქართველოს სახელმწიფოებრივი დამოუკიდებლობის აღდგენა გამოაცხადა და აქტი გამოსცა.