ნიკოლოზ ბასილაშვილის ყოფილი ცოლის, ნელი დოროყაშვილის განცხადებით, მასზე ჩოგბურთელი თანაცხოვრების დროსაც ძალადობდა. ამის შესახებ მან ტელეკომპანია ფორმულასთან ისაუბრა.

"დავშორდი იმის გამო, რომ ძალადობას ვეღარ მოვითმენდი. ძალადობას ჰქონდა პერმანენტული ხასიათი ჩვენი თანაცხოვრების დროსაც. [...] ძალიან დიდი ხნის გაშორებულები ვიყავით ჩვენ და უკვე ძალადობას ჰქონდა პირველად ადგილი, გაშორების შემდეგ, 2020 წლის 21 მაისს", — აცხადებს დოროყავშილი.

მისი თქმით, საქმეში არის როგორც ვიდეო, ისე აუდიო მტკიცებულებები, ასევე, ფსიქოლოგიური ექსპერტიზისა და სამხარაულის ბიუროს დასკვნა დაზიანების შესახებ.

"არ იყო ეს მსუბუქი დაზიანება, საკმაოდ რთული დაზიანება და სისხლნაჟონი იყო ძალიან დიდი. უამრავი მტკიცებულება არსებობს და რა თქმა უნდა, ყველა ადასტურებს მის ბრალეულობას, სამწუხაროდ", — ამბობს დოროყაშვილი.

გარდა ამისა, ის ამბობს, რომ თავდაპირველად ნიკოლოზ ბასილაშვილის, შემდეგ კი მისი ოჯახის მხრიდან იყო მოთხოვნა, რომ კარიერისთვის თავი დაენებებინა და სწავლა აღარ გაეგრძელებინა.

"იყო ნიკას მხრიდან პირველ რიგში და შემდეგ უკვე ოჯახის მხრიდან მოთხოვნა, რომ სამსახურისთვის, კარიერისთვის თავი უნდა დამენებებინა, მაგისტრატურაში აღარ უნდა ჩამებარებინა, სწავლა აღარ უნდა გამეგრძელებინა, სამსახურისთვის თავი დამენებებინა. ყველაფერს დავანებე თავი, ჩემი ცხოვრება ზოგადად დავკარგე და გადავერთე მის კარიერაზე, ანუ მისი კარიერა გახდა ჩემი კარიერა. [...] შეეჩვივნენ იმას, რომ ეს გოგო ჩუმად არის, მოდი, გამოვალ და რასაც მინდა, იმას ვიტყვი. მათ ძალიან კარგად იციან სასამართლოზე მათი სუსტი პოზიციები და ცდილობენ საზოგადოება მაქსიმალურად დიდხანს, სანამ ექნებათ ამის საშუალება, ჰყავდეთ შეცდომაში", — ამბობს დოროყაშვილი.

ჩოგბურთელი ნიკოლოზ ბასილაშვილი არასრულწლოვანი შვილის თანდასწრებით ყოფილ ცოლზე ძალადობაშია ბრალდებული. პროკურატურის ინფორმაციით, მან ნელი დოროყაშვილს ფიზიკური შეურაცხყოფა 2020 წლის 21 მაისს მიაყენა, მეორე დღეს კი ის დააკავეს. საქმის შესწავლა დაიწყო სახალხო დამცველმაც.

ჩოგბურთელს თბილისის საქალაქო სასამართლომ 100 ათასი ლარის ოდენობის გირაო შეუფარდა. ამასთან, შემაკავებელი ორდერია გამოცემული როგორც ჩოგბურთელის, ისე მისი მშობლების მიმართ.

როგორც დაზარალებული ქალი, ნეკა დოროყაშვილი ყვება, სპორტსმენმა მას ფიზიკური დაზიანებები მიაყენა, ხოლო ყოფილი მამამთილი დიდტარიანი საგნით გაეკიდა. მისივე თქმით, დაპირისპირება მაშინ მოხდა, როცა ის შვილის წამოსაყვანად ბასილაშვილის სახლში მივიდა. როგორც ის ამბობს, დაპირისპირების მიზეზი ამ დრომდე არ იცის. დოროყაშვილის განმარტებით, ქონებრივი დავა არ ჰქონიათ, რადგან ეს პროცესი მანამდე დასრულდა მოლაპარაკებით.

სპორტსმენი და მისი ოჯახი ბრალდებებს უარყოფენ. ჩოგბურთელმა განაცხადა, რომ სასამართლოს დასრულებამდე არ აპირებს საჯარო დისკუსიაში შესვლასა და საქმის დეტალებზე საუბარს.