წყალტუბოში გამართულ საკრებულოს შუალედურ აღჩევნებზე ქართული ოცნება ამომრჩევლის მოსყიდვაში დაადანაშაულეს.

თავისუფალი ზონის წარმომადგენლების თქმით, მათ აქვთ ვიდეო-მასალა, რომელშიც ჩანს, თუ როგორ უხდის ქართული ოცნების კოორდინატორი ამომრჩეველს თანხას.

ნაციონალური მოძრაობის წევრმა მამუკა საღარეიშვილმა ტელეკომპანია იმედის ჟურნალისტს განუცხადა, რომ არჩევნების დღემდე გამართული საარჩევნო კამპანიაც მოსყიდვის ფონზე მიმდინარეობდა:

"მთელი კამპანიის მანძილზე ამომრჩევლების მოსყიდვა ხდებოდა. თავისუფალი ზონის წევრებმა თავიანთი კამერით დააფიქსირეს, რომ 52-ე საარჩევნო უბანზე კოორდინატორები ამომრჩევლებს თანხებს ურიგებდნენ".

საღარეიშვილის თქმით, აღნიშნული ვიდეო-მასალას ისინი ტელევიზიებს გადასცემენ.

გავრცელებულ ინფორმაციას ქართული ოცნების წევრი ცოტნე ზურაბიანი ნაციონალური მოძრაობის პროვოკაციას უწოდებს და ბრალდებას ბრალდებით პასუხობს:

"ეს არის პირდაპირი პროვოკაცია ნაციონალური მოძრაობის მხრიდან, მე მეტსაც გეტყვით. თუ დაათვალიერებთ ოთხივე უბანს, აღმოაჩენთ, რომ მიმდებარე ტერიტორიაზე ნაციონალური მოძრაობის წევრები აგიტაციას ეწევიან".

დღეს საკრებულოს შუალედური არჩევნები გლდანის გარდაბნის, კასპის, წყალტუბოს, ოზურგეთის, ხობის და ზუგდიდის ადგილობრივი მაჟორიტარული ოლქების 45 საარჩევნო უბანზე ტარდება.