დაავადებათა კონტროლის ეროვნული ცენტრის ხელმძღვანელის, ამირან გამყრელიძის თქმით, გუშინ, 29 მარტს სამინისტროში Novavax-ის ვაქცინის შესაძენად კონტრაქტი მოვიდა. გამყრელიძის თქმით, მოლაპარაკებები Novavax-ის მილიონი დოზის შესყიდვაზე.

"გუშინ სამინისტროში მოვიდა კონტრაქტი ძალიან პერსპექტიულ ვაქცინაზე, რომელი არის Novavax-ის ვაქცინა, რომელთანაც უკვე, დაახლოებით, 2 თვეა მიმდინარეობს მოლაპარაკებები. Novavax-ი გახლავთ ამერიკული კომპანია. მის მიერ წარმოებული ვაქცინა პრინციპით განსხვავდება დღეს არსებული ასტრაზენეკას, მოდერნას, ფაიზერის ან იგივე ჩინური ვაქცინისგან. Novavax-ი არის ვაქცინების ერთ-ერთი უდიდესი მწარმოებელი მსოფლიოში. მიმდინარეობს საუბარი მილიონი დოზის Novavax-ის შესყიდვაზე", — განაცხადა გამყრელიძემ.

მისივე თქმით, Novavax-ის გარდა საქართველო მოლაპარაკებებს ფაიზერთან აწარმოებს უკვე არა კოვაქსის გავლით, არამედ პირდაპირ ფაიზერიდან შესყიდვაზე. NCDC-ის დირექტორი, ასევე, ამბობს, რომ მიმდინარეობს პირველი მოლაპარაკებები ჯონსონ ენდ ჯონსონთანაც.

გამყრელიძემ, აგრეთვე, აღნიშნა, რომ მასობრივ ვაქცინაციაზე ქვეყანა, დიდი ალბათობით, მაისის თვიდან გადავა.