პარტია მოქალაქეების ლიდერს, ლევან იოსელიანს მიაჩნია, რომ ოპოზიციაში მოიძებნება 17 ადამიან, რომელიც შევა პარლამენტში და საკონსტიტუციო ცვლილებებს მხარს დაუჭერს. მისივე შეფასებით, ამ პროცესში ყველა პოლიტიკური პარტია უნდა ჩაერთოს, რათა პოლარიზაცია დასრულდეს და ყოველი არჩევნები არ იყოს მხოლოდ "ორ ძირითად მოთამაშეს" შორის.

"ეს არის ამოცანა, რომელსაც ჩვენ, პარტია მოქალაქეები ყველანაირად ვცდილობთ, შევუწყოთ ხელი და ამიტომ მიგვაჩნია, რომ მოიძებნება ოპოზიციაში ქვეყანაზე შეყვარებული 17 ადამიანი, რომელიც შემოვა პარლამენტში და მხარს დაუჭერს საკონსტიტუციო ცვლილებებს", — აღნიშნა იოსელიანმა.

პარლამენტში საკონსტიტუციო ცვლილებები დაარეგისტრირეს, რომელიც ქართული ოცნებისა და მოქალაქეების მემორანდუმის საფუძველზე შემუშავდა. თუმცა მის მისაღებად საკანონმდებლო ორგანოში საკმარისი 113 დეპუტატი არაა. ბოიკოტის გამო საპარლამენტო საქმიანობაში მხოლოდ ქართული ოცნების, მოქალაქეებისა და ევროპელი სოციალისტების 96 დეპუტატია ჩართული.

ცვლილებების ერთ-ერთი მნიშვნელოვანი ნაწილია, რომ 2024 წლის საპარლამენტო არჩევნებისთვის ბარიერი 5 პროცენტიდან 3 პროცენტამდე დაიწევს. ქართული ოცნების წევრი, შალვა პაპუაშვილი ამბობს, რომ უახლოეს დღეებში შეიქმნება საკონსტიტუციო ცვლილებების საყოველთაო სახალხო განხილვის კომისია.

გარდა ამისა, ცვლილებების თანახმად, შემცირდება იმ დეპუტატები რაოდენობა, რომელიც ფრაქციის შექმნისთვის არის საჭირო. ფრაქციის შექმნისთვის საჭირო წევრების რაოდენობა 2020 და 2024 წლის მოწვევის პარლამენტებში 7-დან 4-მდე დაიწევს. ამით იმ პარტიებს, რომლებმაც მიიღეს 4%-ზე ნაკლები მხარდაჭერა ვაძლევთ შესაძლებლობას შექმნან ჯამურად 5 საპარლამენტო ფრაქცია და შესაბამისად მიიღონ დამატებითი ბერკეტები საკანონმდებლო საქმიანობის განხორციელებისა და მთავრობის კონტროლისთვის.