28 მარტს საქართველო-ესპანეთის ნაკრების საფეხბურთო მატჩის გამო საზოგადოებრივი ტრანსპორტი, მეტრო და ავტობუსი 01:00 საათამდე იმუშავებს. აღნიშნულის შესახებ ინფორმაციას მთავრობის პრესსამსახური ავრცელებს.

"28 მარტს დაგეგმილ საქართველო-ესპანეთის ნაკრების საფეხბურთო მატჩზე, საკოორდინაციო საბჭოს გადაწყვეტილებით, დაიშვება მაყურებელთა 30%, დისტანციისა და ყველა შესაბამისი ეპიდემიოლოგიური უსაფრთხოების სტანდარტის დაცვით. ბილეთები გაიყიდება ონლაინ-რეჟიმში, ხოლო ის პირები, რომლებიც მატჩზე დასასწრებ ბილეთებს შეიძენენ, 01:00 საათამდე გადაადგილების ნებართვით ისარგებლებენ, რათა მატჩის დასრულების შემდეგ, გადაადგილებაზე მოქმედი შეზღუდვის პერიოდში, შინ დაბრუნება შეძლონ. 28 მარტს, საფეხბურთო მატჩიდან გამომდინარე, 01:00 საათამდე იქნება დაშვებული საზოგადოებრივი ტრანსპორტის — მეტროს და ავტობუსის მუშაობა", — აცხადებენ მთავრობაში.

18 მარტს ცნობილი გახდა, რომ საქართველო- ესპანეთის საფეხბურთო მატჩს გულშემატკივრები დაესწრებიან. საკოორდინაციო საბჭოს გადაწყვეტილებით თამაშზე დაშვებული იქნება გულშემატკივართა 30%.

გულშემატკივრები, რომლებსაც საფეხბურთო მატჩზე დასასწრები ბილეთები ექნებათ, 28 მარტს 01:00 საათამდე გადაადგილების ნებართვით ისარგებლებენ.