"მე ვფიქრობ, რომ გახარიასნაირი ადამიანი პლიტიკაში უნდა იყოს, ზოგადად", — ამის შესახებ ქართული ოცნების დეპუტატმა ქეთევან დუმბაძემ TV პირველს განუცხადა.

პრემიერობიდან გადადგომის შემდეგ გიორგი გახარიამ ჟურნალისტებს პირველად განუცხადა, რომ პოლიტიკიდან წასვლას არ აპირებს. ტელევიზიით გასულ კადრებში ჩანს, რომ გახარია მთავრობის ადმინისტრაციის ყოფილ ხელმძღვანელთან, კახაბერ ქემოკლიძესთან და პარლამენტში მოქმედ დეპუტატთან მიხეილ დაუშვილთან ერთად იყო.

"რეალურად, გეგმებს მივყვებით, ჩვენს დღის წესრიგს, რაც მოგვცემს იმის შესაძლებლობას და საშუალებას, რომ უახლოეს პერიოდში ყველაფერი დეტალურად გაგიზიაროთ და მოგიყვეთ", — განაცხადა გახარიამ.

მოგვიანებით, პოლიტიკაში დარჩენის შესახებ მან ფეისბუქზე დაწერა.

ნიკა მელიასთვის პატიმრობის შეფარდებიდან რამდენიმე საათში 18 თებერვალს საქართველოს პრემიერმინისტრი, გიორგი გახარია გადადგა. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.

გახარიამ მაშინ განაცხადა, რომ მისი ურყევი პოზიციაა, "ერთი კონკრეტული ადამიანის მიმართ თუნდაც კანონიერი, მართლმსაჯულებით განსაზღვრული ღონისძიების აღსრულება, თუ ეს რისკს უქმნის ჩვენი მოქალაქეების ჯანმრთელობას, სიცოცხლეს ან საერთოდ ქვეყანაში ქმნის პოლიტიკური ესკალაციის შესაძლებლობას, არის მიუღებელი".