ნაციონალური მოძრაობა ხურჩაში მომხდარი მკვლელობის გამო საქართველოს პრეზიდენტს მიმართავს, რომ დაუყოვნებლივ მოიწვიოს უშიშროების საბჭო იმისთვის, რომ იმ სტრატეგიის შემუშავება მოხდეს, რომელიც საქართველოს მთავრობის სამომავლო ნაბიჯებს განსაზღვრავს.

ენმ-ს წევრის, გიგი წერეთლის განცხადებით, პოლიტიკა, რომელსაც დღეს საქართველოს ხელისუფლება ახორციელებს ოკუპირებულ ტერიტორიებთან დაკავშირებით, იქ მაცხოვრებლების დაცვის თვალსაზრისით, არაეფექტურია:

"პრაქტიკულად ეს არის კრახი. ასეთ ვითარებაში, როდესაც ამგვარი დაძაბულობაა და ადამიანები თავს აბსოლუტურად დაუცველად გრძნობენ და სახელმწიფომ უნდა განახორციელოს განსაკუთრებული ზომები, ჩვენ მიგვაჩნია, რომ პრეზიდენტმა, როგორც მთავარსარდალმა და უშიშროების საბჭოს ხელმძღვანელმა, უნდა მოიწვიოს ეს საბჭო და უნდა იმსჯელონ იმის თაობაზე, თუ რა ნაბიჯები უნდა გადადგას ხელისუფლებამ".

მისი განმარტებით, ვინაიდან საოკუპაციო ხაზთან საგუშაგოები არ არის და დაცვის დონე მინიმუმამდეა დაყვანილი, პრაქტიკულად ძალიან ცოტაა იმ სამართალდამცავთა ჯგუფები, რომლებიც უნდა მორიგეობდნენ, პარალელურად ვხედავთ იმას, რომ ივანიშვილის სახლთან სწორედ სამართალდამცავები აკავებენ იმ ადამიანებს, ვინც აღნიშნული პოლიტიკის წინააღმდეგ აქციებს მართავს.