საგარეო საქმეთა მინისტრის, დავით ზალკალიანის განცხადებით, ნატოში არ იღებენ ქვეყანას, სადაც ლეგიტიმურად არჩეულ პარლამენტს ოპოზიცია ბოიკოტს უცხადებს.

"მოლაპარაკებები არის კომპრომისზე დაფუძნებული და მოლაპარაკებებზე წინაპირობებით, დათქმებით წასვლა ნიშნავს მოლაპარაკებების პროცესის ჩიხში შეყვანას. მე არ შევეხები იმ დეტალებს, რომელიც მიმდინარეობს მოლაპარაკებების პროცესში, მაგრამ ხელისუფლების მხრიდან ნება გამოვლენილია და ეს რის უკვე დადებული მოლაპარაკების მაგიდაზე. იგივე ის ფაქტი, რომ საარჩევნო რეფორმა განხორციელდა, იგივე ის, რომ მზაობა არის ხელისუფლების მხრიდან მართლმსაჯულების რეფორმა განხორციელდეს, ეს საკანონმდებლო ცვლილებები ყველაფერი ერთად ვერ მოხერხდება, თუ ოპოზიცია არ შევიდა პარლამენტში, ეს სწორედ მათი ჩართულობით უნდა მოხდეს. ჩვენ ვიხილეთ ჯეიმს აპატურაის ძალიან მკაფიო გზავნილი ნატოს მხრიდან, ბოიკოტი არ არის ნორმალური, ცივილიზებული ევროპული დემოკრატიისთვის. ნატოში არ იღებენ ქვეყანას, სადაც ოპოზიციური პარტიები ბოიკოტს უცხადებენ ლეგიტიმურად არჩეულ პარლამენტს, ამიტომ ყველამ ეს უნდა გავითვალისწინოთ და ქვეყნის ინტერესებიდან გამომდინარე ვიმოქმედოთ", — განაცხადა ზალკალიანმა.

მისივე თქმით, ქვეყანას ასეთი სერიოზული გეოპოლიტიკური გამოწვევების ფონზე არ აქვს იმის ფუფუნება, რომ ღრმა პოლიტიკურ კრიზისში შევიდეს.

"თქვენ იხილეთ ის საჯარო განცხადებები, რომლებიც გააკეთეს ევროკავშირის უმაღლესი ხელისუფლების წარმომადგენლებმა. არაფერი დამალული არ ყოფილა იქ. რა თქმა უნდა, შეხვედრები ინტენსიური იყო და ძალიან დატვირთული და შინაარსიანი. ჩვენ პარტნიორებს და ჩვენც ძალიან გვსურს, რომ პროცესი რაც შეიძლება სწრაფად დასრულდეს იმიტომ, რომ კიდევ ერთხელ ვამბობ, ჩვენ იმის ფუფუნება, რომ შევიდეთ ღრმა პოლიტიკურ კრიზისში იმ ფონზე, როდესაც ასეთი სერიოზული გეოპოლიტიკური გამოწვევების წინაშე დგას ქვეყანა. როგორ წარმოგიდგენიათ, რომ დაუსრულებლად მიმდინარეობდეს ეს პროცესი მაშინ, როდესაც ჩვენს გარშემო გეოპოლიტიკური სიტუაცია შეცვლილია, ვხედავთ რუსეთის უკანონო ქმედებებს ოკუპირებულ ტერიტორიებზე და ასევე, იმ საფრთხეებს, რომელიც მომდინარეობს ამ ახალი გეოპოლიტიკური სიტუაციიდან გამომდინარე", — თქვა მინისტრმა.