დაავადებათა კონტროლის ცენტრის ხელმძღვანელი, ამირან გამყრელიძე ამბობს, რომ კორონავირუსის პანდემიის დასამარცხებლად ვაქცინის გაკეთება აუცილებელია. ის რესპუბლიკურ საავადყოფოში მივიდა, სადაც ვაქცინაციის პროცესი დაიწყო.

"დაწყება ძალიან კარგია, მაგრამ მთავარია დამთავრება. ჩვენ უნდა ავცრათ წელს მილიონ 600 ათას ადამიანი. თუ ამას გავაკეთებთ, ვუბრუნდებით ცხოვრების ჩვეულებრივ რიტმს", — აღნიშნავს გამყრელიძე.

გარდა ამისა, NCDC-ის ხელმძღვანელს ჰკითხეს როგორ აპირებენ დაარწმუნონ მოსახლეობის 41 პროცენტი, რომელსაც ვაქცინის გაკეთება არ სურს, რაზეც მან უპასუხა:

"მოსახლეობის ეს პროცენტი თქვენთან ერთად უნდა დავარწმუნოთ, რომ აცრაზე კარგი ჯერჯერობით მსოფლიოს და კაცობრიობას ამ ორი საუკუნის განმავლობაში არ მოუგონია. აცრამ დაამარცხა ყვავილი, აცრა ამარცხებს პოლიომიელიტს, აცრა ამარცხებს წითელას, აცრა დაამარცხებს კოვიდს".

დღეს, 15 მარტს საქართველოში კორონავირუსის წინააღმდეგ ვაქცინაცია დაიწყო. დაავადებათა კონტროლის ცენტრის ხელმძღვანელის მოადგილე, პაატა იმნაძე ერთ-ერთი პირველი იყო, ვინც ვაქცინა საჯაროდ გაიკეთა. მის გარდა, აიცრნენ ინფექციური საავადმყოფოს ექიმები, მათ შორის მარინა ეზუგბაია და მარინა ენდელაძე.

დღესვე, იგეგმება იმ ექიმების აცრაც, რომლებიც პანდემიის პერიოდში მედიასთან კორონავირუსთან დაკავშირებით საუბრობდნენ. სავარაუდოდ, ამის მიზანი კოლეგებისთვის მაგალითის მიცემაცაა.

დაავადებათა კონტროლის ეროვნულ ცენტრის (NCDC) ცნობით, COVID-19-ის საწინააღმდეგო ვაქცინაციის ელექტრონულ სისტემაში ვიზიტი 14 მარტის 23:00 საათის მონაცემებით, ჯანდაცვის 2 067 მუშაკს აქვს დაჯავშნილი.

საქართველოში AstraZeneca-ს ვაქცინის 43 200 დოზა შაბათს, 13 მარტს შემოვიდა და ის განკუთვნილია სამედიცინო პერსონალისთვის. შემდეგი ეტაპია ხანგრძლივი მოვლის დაწესებულებების ბენეფიციარებისა და პერსონალის აცრა, ამის მერე კი, ვაქცინას 75 წელზე მეტი ასაკის ადამიანებს გაუკეთებენ.

ვაქცინაციისთვის ქვეყანაში შერჩეულია 82 დაწესებულება, თუმცა პირველ ეტაპზე პროცესი 29 ცენტრში დაიწყება და კვირის განმავლობაში ახალი ამცრელი პუნქტები დაემატება.

ჯანდაცვის მინისტრმა, ეკატერინე ტიკარაძემ 11 მარტს განაცხადა, რომ საწყის ეტაპზე აიცრება 43 200 ადამიანი და რადგან ეს ვაქცინა 2 დოზით კეთდება, მეორე დოზას აცრილები გაიკეთებენ მაშინ, როცა დამატებითიც შემოვა. მისი თქმით, იციან დროის მონაკვეთი, როცა გარანტირებულად მიიღებენ მეორე დოზებს და აქვთ დასტური, რომ შემოტანა გარანტირებულად მოესწრება.

გაიგეთ მეტი: