ახალქალაქისა და კუმურდოს მიტროპოლიტი ნიკოლოზი, რომელიც ამჟამად გერმანიაში იმყოფება, ჟურნალისტებთან საუბარში აცხადებს, რომ არც მას და არც პატრიარქს არ სჯერა, რომ ვინმემ შესაძლოა, ილია მეორის მოწამვლა სცადა:

"მე არ მჯერა, რომ საქართველოში არსებობს ადამიანი, რომელსაც ასეთი აზრი შეიძლება გაუჩნდეს თავში. ამის არც პატრიარქს არ სჯერა და არც მღვდელთმთავრებს. საერთოდ ეგეთი რამ არ გამიგია, რომ ვინმეს ვინმე მოეწამლოს, წიგნებში წამიკითხავს მარტო ასეთი რამ. რაც შეეხება იმას, რომ ასეთი აჟიოტაჟია ამის გამო ატეხილი, არ ვიცი ეს რა არის, მაგრამ თუკი რაიმე სერიოზული ამბავია, ის სამსახურები, რომლებიც ამით არიან დაკავებულები ასე პირდაპირ არც თქვენ მოგიყვებიან და არც ჩვენ".

ტელეკომპანია რუსთავი 2-ის ინფორმაციით, თბილისის საერთაშორისო აეროპორტში, პარასკევს გამთენიისას საპატრიარქოს ქონების განკარგვის სამსახურის ხელმძღვანელი მამა გიორგი მამალაძე დააკავეს. მათივე წყაროს ინფორმაციით, შესაძლოა საქმე ეხებოდეს პატრიარქის მოწამვლის მცდელობას. სახელმწიფო დაცვის სპეციალური სამსახურის უფროსი, ანზორ ჩუბინიძე ადასტურებს რუსთავი 2-ის ინფორმაციას იმის შესახებ, რომ სასულიერო პირი გიორგი მამალაძე დაკავებულია.

საქართველოს მართლმადიდებელი ეკლესიის კათოლიკოს პატრიარქს, ილია მეორეს ამჟამად ბერლინის ერთ-ერთ საავადმყოფოში ოპერაციას უტარებენ.