ქართული ოცნების დამფუძნებლის შვილი და მომღერალი ბერა ივანიშვილი ამტკიცებს, რომ ჩანაწერები არა 2017 წელს არამედ 2010-2011 წლებში არის გაკეთებული. მისი თქმით, ამ დროს მას და მის გულშემატკივრებს თავს ესხმოდნენ და აბულინგებდნენ სოციალურ ქსელში და ის 15-16 წლის იყო.

"მოდით, მაშინ ყველამ ერთად გავაანალიზოთ ეს სცენარი, რომელსაც ოპოზიციური არხები ატრიალებენ — ეს თუ იყო 2017 წელს გაკეთებული ჩანაწერი, ეს ნიშნავს, რომ ქართული ოცნება უსმენს მის პრემიერმინისტრს, უსმენს ანზორ ჩუბინიძეს, მისმენს მე და შემდგომ ამ ჩანაწერებს აწვდის ოპოზიციურ არხებს, ოღონდ თან თარიღი არ იცის როდის გვისმენს. გვისმენს, მაგრამ თარიღი არ იცის და ეს, თუ ესენი რასაც ამბობენ მთავრობა არ იყო და ანონიმური, უცხო, ვიღაც სუპერ აგენტი X არის; ესე იგი ამ კაცმა შეძლო, რომ ამ ყველა ჩანაწერს თავი მოუყარა ჩვენსას და თარიღი არ იცის, ეს ერთი დეტალია.

მეორე მხარეს მთელმა საქართველომ იცის, რომ როდესაც კონკრეტული პოლიტიკური პარტია იყო ქვეყნის მმართველობაში ხდებოდა ტოტალური მოსმენა არამარტო არასრულწლოვანი ბერასი, არამედ ვისიც უნდოდათ, ვინც მათ აინტრესებდათ, მთელი საქართველოს უკანონო მოსმენა ხდებოდა და ეს ყველას კარგად მოგეხსენებათ", — განაცხადა მან იმედის ეთერში.

რაც შეეხება ჩანაწერების ავთენტურობაზე დასმულ კითვას, ბერა ივანიშვილი ამბობს, რომ მისთვის არ აქვს მნიშვნელობა ჩანაწერები დამონტაჟებულია თუ არა, რადგან ახლაც ასე ფიქრობს, დღესაც "აბსოლუტურად იგივე პოზიციაზე" არის და ამატებს, რომ თუ ვინმე დედას შეაგინებს და მის ოჯახს შეეხება, "აუცილებლად მოსთხოვს პასუხს დღესაც".

TV პირველმა 6 მარტს გაავრცელა ჩანაწერები, სადაც, ირაკლი ღარიბაშვილი, ბერა ივანიშვილი და ანზორ ჩუბინიძე იმ ადამიანების დასჯას გეგმავენ და განიხილავენ, ვინც ბერა ივანიშვილს აგინებს. ჩანაწერში საუბარია უკვე მომხდარ ფაქტებზეც, რომელთა მოყოლის პროცესში ირაკლი ღარიბაშვილი და ბერა ივანიშვილი იციანიან. სავარაუდოდ, ქართული ოცნების დამფუძნებლის შვილი კმაყოფილებას გამოხატავს იმის გამო, რომ მისი გინებისთვის ადამიანები ისჯებიან.

ჩანაწერებს ქართული ოცნების რამდენიმე ლიდერი გამოეხმაურა. მაგალითად, პარტიის აღმასრულებელმა მდივნის, მამუკა მდინარაძის თქმით, ჩანაწერები 2010 წლისაა და "ფაბრიკაციაა". მოგვიანებით, პარლამენტის თავმჯდომარის პირველმა მოადგილემ, გია ვოლსკიმ განაცხადა, რომ "2011 წელს არის გაკეთებული ჩაწერები, რაღაც ფრაგმენტები ამოღებული და შეკოწიწებული".

ამ დროისთვის უცნობია, ავთენტურია თუ არა ჩანაწერები. ქართული ოცნების რამდენიმე ლიდერმა ჯერ კიდევ გადაცემის ანონსის შემდეგ თქვა, რომ ეს არის "ფაბრიკაცია" და "შეკოწიწებული". თავდაპირველად ჩანაწერის გაკეთების თარიღად მათ 2011 წელი დაასახელეს, შემდეგ კი — 2010. ჩანაწერებს ამ დრომდე არ გამოხმაურებია შინაგან საქმეთა სამინისტრო, მიუხედავად იმისა, რომ ისმის სავარაუდო ძალადობისა და მომავალი ძალადობის გეგმების შესახებ. კომენტარები არ გაუკეთებიათ არც პრემიერმინისტრ ღარიბაშვილსა და ბერა ივანიშვილს.

ჩანაწერების გავრცელების შემდეგ რამდენიმე მუსიკოსმა და მოქალაქემ განაცხადა, რომ ბერა ივანიშვილზე არასასურველი კომენტარისა და განცხადებების გამო, მათ ემუქრებოდნენ.