პარტია მოქალაქეები ჩანაწერებთან დაკავშირებით პარლამენტში დროებითი საგამოძიებო კომისიის შექმნის ინიციატივით გამოვიდნენ.

"პარლამენტს აქვს რეალურად ბერკეტი, დაიბაროს ყველა ის ადამიანი, ვინც არის ამ ჩანაწერებში მონაწილე. დაიბაროს, მათ შორის, ის ჟურნალისტები, ის ადამიანები, ვისზეც, სავარაუდოდ, განხორციელდა ზეწოლა და მათგან, უშუალოდ პირველწყაროსგან მოვისმინოთ როდის მოხდა, როგორ მოხდა, რა მოხდა", — აცხადებს იოსელიანი.

ალეკო ელისაშვილის თქმით, თუ შინაარსზე და ჩანაწერის ავთენტურობაზე არ დაიწყო გამოძიება, ის იქნება პოლიტიკურად მოტივირებული.

"პირველი, რაზეც გამოძიებამ უნდა გასცეს პასუხი, წესით, ჩვენ რომ ნორმალური ქვეყანა ვიყოთ, არის ის, ავთენტურია თუ არა ჩანაწერი, როდის არის გაკეთებული და ჩანაწერის მონაწილე პირები, ბატონი ღარიბაშვილი და ბატონი ჩუბინიძე იმ დროს, როდესაც საუბრობდნენ, იკავებდნენ თუ არა პოლიტიკურ თანამდებობებს. ეს არის ყველაზე მნიშვნელოვანი კითხვები და რახან ამაზე, ანუ შინაარსზე და ჩანაწერის ავთენტურობაზე არ დაიწყო გამოძიება, გასაგებია, რომ ეს იქნება პოლიტიკურად მოტივირებული, წყალ-წყალა გამოძიება. ანუ ისეთი, როგორ გამოძიებასაც პროკურატურა ატარებს. სწორედ ამიტომ ვამბობთ ჩვენ, პარტია მოქალაქეების წარმომადგენლები და პარლამენტის წევრები, რომ გაცილებით ეფექტური იქნებოდა და იქნება დროებითი საგამოძიებო კომისიის შექმნა", — ამობს ელისაშვილი.

TV პირველმა 6 მარტს გაავრცელა ჩანაწერები, სადაც, სავარაუდოდ, ირაკლი ღარიბაშვილი, ბერა ივანიშვილი და ანზორ ჩუბინიძე იმ ადამიანების დასჯას გეგმავენ და განიხილავენ, ვინც ბერა ივანიშვილს აგინებს. ჩანაწერში საუბარია უკვე მომხდარ ფაქტებზეც, რომელთა მოყოლის პროცესში სავარაუდოდ, ირაკლი ღარიბაშვილი და ბერა ივანიშვილი იციანიან. სავარაუდოდ, ქართული ოცნების დამფუძნებლის შვილი კმაყოფილებას გამოხატავს იმის გამო, რომ მისი გინებისთვის ადამიანები ისჯებიან.

ჩანაწერებს ქართული ოცნების რამდენიმე ლიდერი გამოეხმაურა. მაგალითად, პარტიის აღმასრულებელმა მდივნის, მამუკა მდინარაძის თქმით, ჩანაწერები 2010 წლისაა და "ფაბრიკაციაა". მოგვიანებით, პარლამენტის თავმჯდომარის პირველმა მოადგილემ, გია ვოლსკიმ განაცხადა, რომ "2011 წელს არის გაკეთებული ჩაწერები, რაღაც ფრაგმენტები ამოღებული და შეკოწიწებული".

ამ დროისთვის უცნობია, ავთენტურია თუ არა ჩანაწერები. ქართული ოცნების რამდენიმე ლიდერმა ჯერ კიდევ გადაცემის ანონსის შემდეგ თქვა, რომ ეს არის "ფაბრიკაცია" და "შეკოწიწებული". თავდაპირველად ჩანაწერის გაკეთების თარიღად მათ 2011 წელი დაასახელეს, შემდეგ კი — 2010. ჩანაწერებს ამ დრომდე არ გამოხმაურებია შინაგან საქმეთა სამინისტრო, მიუხედავად იმისა, რომ ისმის სავარაუდო ძალადობისა და მომავალი ძალადობის გეგმების შესახებ. კომენტარები არ გაუკეთებიათ არც პრემიერმინისტრ ღარიბაშვილსა და ბერა ივანიშვილს.

ჩანაწერების გავრცელების შემდეგ რამდენიმე მუსიკოსმა და მოქალაქემ განაცხადა, რომ ბერა ივანიშვილზე არასასურველი კომენტარისა და განცხადებების გამო, მათ ემუქრებოდნენ.