დიდი ბრიტანეთის სამეფო ოჯახი ყურადღების ნაკლებობას არასდროს განიცდიდა, თუმცა მას შემდეგ, რაც პრინცმა ჰარიმ და მეგან მარკლმა მაღალი რანგის სამეფო სტატუსი დატოვეს, წყვილის მიმართ ინტერესი კიდევ უფრო იზრდება. თებერვალში მეგან მარკლმა ბრიტანულ ტაბლოიდს პირადი წერილების გამოქვეყნების შესახებ სასამართლო დავა მოუგო, რამდენიმე დღის წინ კი პრინცი ჰარი CBS-ის შოუ, The Late Late Show-ში გამოჩნდა. მან შოუს წამყვან ჯეიმს კორდენთან ერთად სამხრეთ კალიფორნია მოიარა და სხვადასხვა თემის, მათ შორის, სერიალ The Crown-ის შესახებ გულწრფელად ისაუბრა.

ამჯერად ცნობილი წყვილი ოპრა უინფრის გაესაუბრა. ინტერვიუს შესახებ CBS-მ ორი მოკლე ვიდეო გამოაქვეყნა. ეს პრინცი ჰარისა და მეგან მარკლის პირველი სატელევიზიო ინტერვიუ იქნება მას შემდეგ, რაც სამეფო კარის ვალდებულებებზე უარი განაცხადეს და საცხოვრებლად კალიფორნიაში გადავიდნენ.

ფოტო: CBS

"ყველაზე მეტად ისტორიის განმეორების მეშინოდა", — განაცხადა პრინცმა ჰარიმ, სავარაუდოდ, დედის შესახებ საუბრისას.

გავრცელებული ვიდეოს მიხედვით, ოპრა უინფრისთან საუბარში წყვილმა პრინცესა დაიანაც გაიხსენა.

"შვებასა და ბედნიერებას ვგრძნობ, რადგან ჩემი ცოლი ჩემს გვერდითაა, როცა აქ ვზივარ და გესაუბრებით. წარმოდგენაც არ შემიძლია, როგორ გაიარა წლების წინ მთელი ეს პროცესი მან (პრინცესა დაიანამ) მარტომ. ეს ყველაფერი ჩვენთვის წარმოუდგენლად რთული აღმოჩნდა, მაგრამ, სხვა თუ არაფერი, ერთმანეთი მაინც გვყავდა", — ამბობს პრინცი ჰარი ინტერვიუში.

ერთ-ერთ კლიპში ოპრა უინფრიმ აღნიშნა, რომ ინტერვიუს განმავლობაში ყველა თემაზე შეიძლებოდა საუბარი, ერთ შემთხვევაში კი განაცხადა, რომ წყვილის მონათხრობი შოკისმომგვრელი იყო.

ჯეიმს კორდენთან ინტერვიუში პრინცმა ჰარიმ განაცხადა, რომ ბრიტანული პრესა მის მენტალურ ჯანმრთელობას ანადგურებდა. მისი თქმით, ზუსტად ისე მოიქცა, როგორც ნებისმიერი ქმარი მოიქცეოდა და ასეთ გარემოს თავისი ოჯახი განარიდა. წყვილი ამჟამად კალიფორნიაში ცხოვრობს და მეორე შვილს ელოდება.

ამავე თემაზე: