როცა საქმე დიდი ბრიტანეთის სამეფო ოჯახის წევრებს ეხება, პრინცი ჰარი ხშირად ხდება გამონაკლისი. ამჯერადაც, ის იმ ერთ-ერთ იშვიათთაგანია, რომელმაც ნეტფლიქსის პოპულარული სერიალის, The Crown-ის შესახებ გულწრფელად ისაუბრა.

ჰარი, რომელიც ცოლთან, მეგანთან და შვილთან, არჩისთან ერთად ლოს-ანჯელესში ცხოვრობს, ჯეიმს კორდენის გადაცემის სტუმარი იყო. CBS-ის შოუს, The Late Late Show-ს მონაწილემ წამყვანთან ერთად სამხრეთ კალიფორნია ტურისტული ავტობუსით მოიარა და სხვადასხვა თემაზე ისაუბრა.

ჰარის თქმით, The Crown მაყურებელს უჩვენებს, როგორია ბრიტანეთში სამეფო ოჯახის წევრის ცხოვრება:

"მათ [სერიალის შემქმნელებს] არ აქვთ პრეტენზია, რომ ზუსტ ინფორმაციას გვაწვდიდნენ. ეს მედია არაა. მხატვრულია, თუმცა, შეძლებისდაგვარად სიმართლეზეა დაფუძნებული. რა თქმა უნდა, აკურატული არაა, მაგრამ მიახლოებით მაინც გაგებინებს, როგორია სამეფო ოჯახის ცხოვრების წესი. წნეხი, რომელიც ოჯახისგან, საზოგადოებისგან და სხვა ყველაფრისგან მოდის".

The Crown

ფოტო: Netflix

ჰარიმ დასძინა, რომ ბრიტანული პრესა და ტაბლოიდები მის მენტალურ ჯანმრთელობაზე უარყოფითად მოქმედებდნენ:

"ჩემთვის სერიალი The Crown ბევრად უფრო კომფორტულია, ვიდრე ამბები, რომლებიც ჩემს ოჯახზე, ჩემს ცოლზე ან ჩემზე იწერება. რადგან... სერიალი მხატვრულია და ვისაც როგორც უნდა, ისე გაიგებს. მაგრამ, როდესაც მედია ფაქტად გაწვდის [სიცრუეს], ამასთან ყოველთვის მექნება პრობლემა".

თებერვლის დასაწყისში მეგან მარკლმა ბრიტანულ ტაბლოიდს პირადი წერილის გამოქვეყნებისთვის სასამართლო დავა მოუგო. ამ ამბიდან რამდენიმე დღეში ცნობილი გახდა, რომ მეგანი და ჰარი მეორე შვილს ელოდებიან. სასიხარულო სიახლის გაჟღერების დღეს, რამდენიმე საათით ადრე ერთ-ერთი ტაბლოიდი წყვილის დაშორებას ამტკიცებდა.

სერიალ გვირგვინის ბოლო სეზონში პრინცესა დაიანას ცხოვრებას და მის მიმართ წნეხს ვხედავთ. სერიალი პრინცი ჩარლზისა და მისი ამჟამინდელი ცოლის, კამილას შესახებაც გვიყვება. მისი გამოსვლის შემდეგ, მაყურებლები დიანასადმი დამოკიდებულების გამო ოჯახის წევრებს აკრიტიკებდნენ, რის შემდეგაც უელსის პრინცისა და კორნუოლის ჰერცოგინიას ტვიტერზე კომენტარის დატოვების ფუნქცია დროებით დამალეს. ბრიტანეთის კულტურის სამინისტროს წარმომადგენელმა კი განაცხადა, რომ ნეტფლიქსს სერიალის დასაწყისში უნდა მიეთითებინა, რომ შოუ მხატვრულია. თუმცა, ეს ისედაც ცხადი იყო.

რაც შეეხება კითხვას, თუ ვინ უნდა რომ მისი როლი ითამაშოს, ჰარიმ განაცხადა, რომ საკუთარი თავის როლში სიამოვნებით იხილავდა Homeland-ის მსახიობს დემიენ ლუისს.

პრინცი ჰარი და დემიენ ლუისი 2016 წელს.

ფოტო: Getty / WPA Pool

კარპულ კარაოკეში ჰარიმ ასევე აღნიშნა, რომ ის და მეგანი არჩისთან ერთად დედოფალს და პრინც ფილიპს Zoom-ის საშუალებით ესაუბრებიან. მან დასძინა, რომ ელისაბედ მეორემ შვილთაშვილს საშობაო საჩუქრად ბელგიური ვაფლის საცხობი გაუგზავნა.