ნაციონალური მოძრაობის ოფისში ოპოზიციის შეხვედრა მიმდინარეობს. როგორც პოლიტიკოსებმა განაცხადეს, საორგანიზაციო შეხვედრა იმ საკითხებს ეხება, რომლებიც 26 თებერვალს, ენმ-ს თავმჯდომარის, ნიკა მელიას მხარდასაჭერ აქციაზე გააჟღერეს.

რესპუბლიკური პარტიის ლიდერის, თამარ კორძაიას თქმით, ოპოზიციისთვის მნიშვნელოვანი იქნება ევროპული საბჭოს პრეზიდნეტის, შარლ მიშელის ვიზიტიც.

"შარლ მიშელის ჩამოსვლას ველოდებით ოპოზიციის წარმოამდგენლები, იმიტომ, რომ მიგვაჩნია, სასიცოცხლოდ მნიშვნელოვანია ჩვენი ევროპელი პარტნიორების ჩარევა, რადგან ქართული ოცნება ბიძინა ივანიშვილით სათავეში სრულიად დასულია ყოველგვარ გონივრულ საზღვრებს", — თქვა მან.

უახლოეს ორ კვირაში ოპოზიცია რამდენიმე აქციას, ასევე, ორი შენობის პიკეტირებას გეგმავს. ამის შესახებ ერთიანი ნაციონალური მოძრაობის ერთ-ერთმა ლიდერმა, ხატია დეკანოიძემ პარლამენტთან გამართულ აქციაზე განაცხადა.

ამასთან, ევროპული საბჭოს პრეზიდენტი შარლ მიშელი საქართველოში ოფიციალური ვიზიტით ჩამოდის. საბჭოს ვებგვრედზე განთავსებული ინფორმაციით, მას დაგეგმილი აქვს შეხვედრები პრემიერმინისტრთან, პრეზიდენტთან, პარლამენტის თავმჯდომარესა და ოპოზიციასთან. შარლ მიშელს საქართველოს გარდა, დაგეგმილი აქვს ვიზიტი მოლდოვასა და უკრაინაში, რომლებიც 28 თებერვლიდან 3 მარტის ჩათვლით გაიმართება.