ნაციონალური მოძრაობის ერთ-ერთი ლიდერი, ხატია დეკანოიძე დაავადებათა კონტროლის ეროვნული ცენტრის ხელმძღვანელ ამირან გამყრელიძეს, მის მოადგილეს, პაატა იმნაძესა და თბილისის ინფექციური საავადმყოფოს დირექტორ თენგიზ ცერცვაძეს აკრიტიკებს. დეკანოიძეს სამივე საბჭოთა ნომენკლატურის ადამიანებად მიაჩნია და ამბობს, რომ პანდემიის მართვისას მავნებლობა ჩაიდინეს.

"ხელისუფლება ვერ უმკლავდება [კორონავირუსის პანდემიას]. წარმოუდგენლად საბჭოთა ნომენკლატურის ადამიანებად მიმაჩნია ეს სამი ეპიდემიოლოგი. წარმოუდგენლად მავნებლობა გააკეთეს. მათ შორის, ჩვენ არ გვქონდა იმის ფუფუნება, რომ მთელი ქვეყნის ეკონომიკა მოესპოთ და ჩაეკეტათ. სხვათა შორის, პირველი დღიდან ვაპროტესტები ამ საკარანტინე სივრცეებს. უდიდესი შეცდომა კი არა, უდიდესი ფულის კეთების მახე იყო... 100 მილიონზე მეტია გადარიცხული, 100 მილიარდი ლარი აიღეს, სად წავიდა ეს ფული კაცმა არ იცის. მოკლედ, არანაირი მენეჯმენტი არ იყო. თუ ჩაკეტავ, ბიზესს გააქრობ, საშუალო და მცირე ბიზნესს მოსპობ, კი, შეგიმცირდება შემთხვევები", — განაცხადა დეკანოიძემ პლატფორმა Clubhouse-ში On.ge-ს კითხვის პასუხად.

მისივე თქმით, Covid-19-ით გამოწვეული ეკონომიკური ვარდნა დიდი ხანი გაგრძელდება და გაღრმავდება. ის გამოსავალს სწრაფ ვაქცინაციაში ხედავს.