მოემზადეთ, თქვენი საყვარელი გამომძიებლების რიგებს მალე, შესაძლოა, ტომ ჰარდიც შეემატოს.

19 თებერვალს ნეტფლიქსმა ოფიციალურად გაავრცელა ინფორმაცია, რომ ამ სტრიმინგ სერვისის ახალ კინოპროექტში მთავარ როლს ინგლისელი ვარსკვლავი, ტომ ჰარდი მოირგებს.

Havoc (ნგრევა) — ასე ერქმევა ფილმს, რომელშიც ჰარდის დეტექტივი პერსონაჟი პოლიტიკოსის გატაცებული შვილის გადარჩენას შეეცდება, ამავდროულად კი კორუფციის ქსელს გამოავლენს.

ფილმის რეჟისორი გარეტ ევანსი იქნება, რომელსაც აქამდე ისეთ ცნობილ პროექტებზე უმუშავია, როგორებიცაა ფილმი The Raid (დარბევა) და სერიალი Gangs of London (ლონდონის ბანდები).

ტომ ჰარდი ერთადერთი ცნობილი სახე არ არის, რომელსაც მომავალ პროექტში ვიხილავთ: სამსახიობო გუნდის წევრები არიან ბილ სკარსგარდი, პიტ დევიდსონი, ეშტონ სანდერსი და სტივენ ჯეიმსი.

ტომ ჰარდი მაყურებელმა ბოლოს ალ კაპონეს როლში იხილა და მალე, წესით, ვენომის მეორე ნაწილით დაბრუნდება ეკრანებზე.

ჯერჯერობით უცნობია, თუ როდის შედგება Havoc-ის პრემიერა, თუმცა ჰარდის ერთგულმა გულშემატკივრებმა კარგად იციან, რომ ლოდინი ყოველთვის ღირს.