ქართული ოცნების დეპუტატის, გია ვოლსკის თქმით, გიორგი გახარიას თანამდებობიდან გადადგომა მისთვის მოულოდნელი იყო და გული წყდება. ვოლკსის განცხადებით, გახარია პირველი ნომერი და ღირსეული პრემიერი იყო.

"ჩემთვის, პირადად, მოულოდნელი იყო მართალი გითხრათ, იმიტომ რომ, იმდენად ნათელი იყო და იმდენად კითხვის გარეშე ჩაიარა ჩვენმა კონსულტაციებმა უმრავლესობაში იმასთან დაკავშირებით, უნდა შემდგარიყო თუ არა სამართლიანი გადაწყვეტილება საქართველოში, რომ მართალი გითხრათ, არ მოველოდი. თუნდაც მისი განცხადების შინაარსიდან გამომდინარე, ადვილად შეიძლება დავასკვნათ რაზე იყო საუბარი, სად არის განსხვავება. ირაკლი კობახიძემაც ილაპარაკა ამასთან დაკავშირებით და დამატებითი კომენტარი ამ თემასთან მიმართებაში არ გამაჩნია, ერთადერთი შემიძლია დავამატო, რომ გული მწყდება.

მინდა გითხრათ, რომ გიორგი გახარია პირველი ნომერი იყო და ღირსეული პრემიერი, რომელსაც საკმაოდ მყარი გუნდი ჰყავდა ჩამოყალიბებული, პრაქტიკულად, ყველა მიმართულებით. განსაკუთრებით ამ კრიზისის მართვის პერიოდში იყო საკმაოდ ეფექტური", — ამბობს ვოლკსი რუსთავი 2-თან.

რამდენიმე საათის წინ ქართულმა ოცნებამ პრემიერმინისტრობის კანდიდატად ირაკლი ღარიბაშვილი დაასახელა. იმ შემთხვევაში, თუ პარლამენტი მთავრობის ახალ შემადგენლობას დაამტკიცებს, ღარიბაშვილი პრემიერმინისტრი მეორედ გახდება.

ნიკა მელიასთვის პატიმრობის შეფარდებიდან რამდენიმე საათში დღეს, 18 თებერვალს საქართველოს პრემიერმინისტრი, გიორგი გახარია გადადგა. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.

გუშინ, 17 თებერვალს თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს.

მთელი ღამის განმავლობაში ნაციონალური მოძრაობის ოფისში ოპოზიციური პარტიების ლიდერები იმყოფებოდნენ. ისინი აცხადებენ, რომ ხელისუფლებას მელიას დაკავების საშუალებას არ მისცემენ. დღეს დილიდან პოლიცია ენმ-ის ოფისთან მივიდა, თუმცა აქტივისტებმა შენობაში არ შეუშვეს. ამის შემდეგ შსს-მ გავრცელა განცხადება და პოლიტიკოსებსა და მხარდამჭერებს მოუწოდა, პოლიციას ხელი არ შეუშალონ სასამართლოს გადაწყვეტილების აღსრულებაში.