პარლამენტის წევრი, ლადო კახაძე განმარტავს, რატომ იზრდება ჯარიმა პირბადის ტარების წესის განმეორებით დარღვევაზე. მისი თქმით, არსებული სანქციის მიუხედავად, ათობით ათასი ადამიანი ამ წესს არღვევს.

"ბოლო სამი თვის განმავლობაში, 14 თებერვლის ჩათვლით, აი, ამ წესების [პირბადის ტარება] შეუსრულებლობის გამო 87 780 ადამიანი დაჯარიმდა, 100 000-მდე, დაახლოებით. ე.ი. ის ადამიანები, რომელსაც ეხვეწები მუხლზე ჩოქვით; კანონს დაუწერ; ადმინისტრაციულ პასუხისმგებლობას განუსაზღვრავ; თან ეტყვი, რომ ეს ეკონომიკურად შენს ჯიბეს მოხვდება, ანუ, შენ დაზარალდები, ეკონომიკურ გაჭირვებაში შეხვალ, კიდევ უფრო დაიმძიმებ მდგომარეობას, მაინც არ დაიჯერეს. ბევრი არის, რომელიც ამას დღესაც არ იჯერებს", — განაცხადა ლადო კახაძემ კომიტეტის სხდომაზე.

მისი თქმით, პირბადის ტარების წესს მიზანმიმართულად არღვევენ, მათ შორის, პოლიტიკოსებიც.

"პოლიტიკურ ველზე გაჩნდნენ ადამიანები, რომლებიც ამბობენ — სრულებით არ მაინტერესებს თქვენ მიერ შექმნილი საკანონმდებლო სივრცე და მე მაქვს უფლება, რომ პირბადე არ ვატარო, ამითი კანონსაც დავარღვევ და ამ კანონის დარღვევა მე უნდა მეპატიოს. რაღაცა ინდულგენციებიც შეიძლება მოიყვანონ, რომ ჩვენ ვერ ვიმოქმედოთ ამ ადამიანების არასწორი ქმედების აღსაკვეთად.

არ გამოვა ასე. ამას სჭირდება, აუცილებლად, რაღაც დოზით გამკაცრება, გინდა ნათქვამი სიტყვით, გინდ ქაღალდზე დატანილით და გინდა საკანონმდებლო სივრცეში იმ ბაზის შექმნით, რომ შესაბამის ადმინისტრაციულ ორგანოებს გავუჩინოთ კიდევ ერთი ბერკეტი [რომ აღკვეთო სამართალდარღვევა]", — აცხადებს კახაძე.

დღეს, 16 თებერვალს, ჯანმრთელობის დაცვისა და სოციალურ საკითხთა და ადამიანის უფლებათა დაცვისა და სამოქალაქო ინტეგრაციის კომიტეტების ერთობლივ სხდომაზე, დეპუტატებმა ერთხმად დაუჭირეს მხარი კანონპროექტს, რომლის მიხედვითაც როგორც ღია, ისე დახურულ საჯარო სივრცეში, ასევე, საზოგადოებრივ ტრანსპორტში, პირბადის ტარების წესის განმეორებითი დარღვევა დაჯარიმდება 50 ლარით. კანონპროექტის ავტორები არიან კომიტეტის წევრები — ლადო კახაძე, რამინა ბერაძე და ზაზა ლომინაძე, ასევე, კომიტეტის თავმჯდომარე, დიმიტრი ხუნდაძე.

2020 წლის 12 ივნისიდან დღემდე პირბადის ტარების წესის დაღვევა რეგულირდება ადმინისტრაციულ სამართალდარღვევათა კოდექსით და ითვალისწინებს ჯარიმას 20 ლარის ოდენობით.