ევროპული საქართველოს ლიდერის, დავით ბაქრაძის განცხადებით, პოლიტიკაში რჩება, მაგრამ პაუზას იღებს პარტიულ პოლიტიკაში. მისი თქმით, დიდი ხანია დაწყებული აქვს დისერტაცია, ასევე, აქვს შემოთავაზებები სხვადასხვა უნივერსიტეტიდან.

"მე ვრჩები პოლიტიკაში, მე ვრჩები ოპოზიციურ ფლანგზე, მაგრამ პარტიული პოლიტიკიდან ვიღებ პაუზას. რას გავაკეთებ ამ პაუზის დროს? არ ვიცი. დიდი ხანია სახლში დაწყებული დისერტაცია მაქვს, შეიძლება დავასრულო. მაქვს მოწვევები სხვადასხვა უნივერსიტეტიდან ლექციის წაკითხვაზე. ბევრი სხვადასხვა შესაძლებლობაა. ამაზე ჯერ საუბარი ნაადრევია, მაგრამ ვიმეორებ, ეს არ არის პოლიტიკიდან წასვლა, მე ოპოზიციურ ფლანგზე დავრჩები და მონაწილეობას მივიღებ ყველა იმ პროცესში, რაც აუცილებელია ამ ქვეყანაში წინსვლისთვის", — თქვა ბაქრაძემ პარტიაში გამართული შეხვედრის შემდეგ.

მან ასევე აღნიშნა, რომ არასწორად მიაჩნია ლიდერების ნაწილის წასვლა და ნაწილის დარჩენა. ბაქრაძის განცხადებით, "განახლების მთელი არსი გახლავთ ის, რომ გუნდი ერთიანად იღებს პასუხისმგებლობას და ერთაიანად ახლდება".

"გასხვავებული აზრი ამ შემთხვევაში აქვს გიგა ბოკერიას. ჩემი და გიგი უგულავას პოზიცია არის, რომ გუნდმა მთლიანად უნდა აიღოს პასუხისმგებლობა და უნდა მოხდეს მთლიანად ახალი სახეებისთვის პოლიტიკური ასპარეზის დათმობა და პარტიის განახლება, გიგას პოზიცია ამ შემთხვევაში გახლავთ ის, რომ მას ამ გადაწყვეტილება საბოლოო მიღებული არ აქვს, თუმცა თავის გადაწყვეტილებას თავად გაახმოვანებს", — განაცხადა ბაქრაძემ.

მან განმარტა, რომ პარლამეტში შესვლას კვლავ არ განიხილავს და ბოიკოტი ძალაშია.

ევროპულ საქართველოში დაგეგმილი სტრუქტურული ცვლილებების შესახებ ინფორმაცია On.ge-მ 9 თებერვალს გაავრცელა. პარტიაში არ ადასტურებდნენ, რომ შესაძლოა, დავით ბაქრაძემ ევროპული საქართველო დატოვოს. თუმცა, ისინი ადასტურებდნენ, რომ 2020 წლის საპარლამენტო არჩევნების შემდეგ პარტიაში ცვლილებებზე დაიწყეს საუბარი.