ხვალ, 5 თებერვალს საზოგადოებრივი მაუწყებლის შენობასთან გადაცემა რეალური სივრცის მხარდასაჭერად აქცია იმართება. აქციის ორგანიზატორი მწვანე მუშტია.

"გვინდა აღვნიშნოთ, რომ რეალური სივრცე ბოლო 5 წლის განმავლობაში, იყო ერთადერთი საზოგადოებრივი გადაცემა საზოგადოებრივი მაუწყებლის ეთერში. ეს იყო სივრცე, რომელიც ეთმობოდა ჩვენი საზოგადოების იმ სოციალურ ჯგუფებს, რომლებსაც ყველაზე მეტად სჭირდებათ დახმარება, იმ ადამიანებს, რომელთა ხმაც არ ისმის საზოგადოებაში, საზოგადოებრივ აქტივიზმს, რომელიც მიმართულია სოციალური პროგრესისკენ. ჩვენ მივიჩნევთ, რომ რეალური სივრცის დახურვა არ იქნება მხოლოდ ერთი გადაცემის არსებობის შეწყვეტა, არამედ ეს იქნება საზოგადოებაში მყოფი ჩაგრული ჯგუფებისა და ადამიანებისათვის ხმის წართმევა, საზოგადოებაში მიმდინარე რეალური პროცესების გაშუქების შეწყვეტა და მცდელობა, რომ მედია სივრცეში ადგილი არ იყოს ხალხისთვის. საზოგადოებრივი მაუწყებელი დაკარგავს იმ ერთადერთ გადაცემას, რომელიც სძენს მას ლეგიტიმაციას იწოდებოდეს საზოგადოებრივად," - აღნიშნულია აქციის ორგანიზატორების მიერ გავრცელებულ განცხადებაში.

აქციის მონაწილეებს მიაჩნიათ, რომ რეალური სივრცე სჭირდება საქართველოს, ქართულ მედიას, ადამიანებს.

"მოგიწოდებთ ყველას, ვისაც გადარდებთ მედია სივრცეში რეალური ინფორმაციის წყაროს შენარჩუნება, შენარჩუნება ხალხის ხმისა საზოგადოებრივ მაუწყებელზე, 5 თებერვალს, საღამოს 6 საათზე შევიკრიბოთ პირველი არხის შენობასთან!.. საზოგადოებრივი მაუწყებელი ჩვენია და არა ელიტების!" - წერს მწვანე მუშტი.

გუშინ, 3 თებერვალს კოალიცია მედიის ადვოკატირებისთვის საზოგადოებრივ მაუწყებელზე მიმდინარე პროცესებს გამოეხმაურა. მათთვის ცნობილი გახდა, რომ საზოგადოებრივი მაუწყებლის მენეჯმენტმა მიიღო გადაწყვეტილება გადაცემა რეალური სივრცის დახურვის შესახებ. ასევე იგეგმება მაუწყებლის სხვა საზოგადოებრივ-პოლიტიკური გადაცემების დახურვა და თანამშრომლების მასობრივი დათხოვნა. დღეს კი, არხის გენერალურმა დირექტორმა, ვასილ მაღლაფერიძემ გადაცემების დახურვის შესახებ ინფორმაცია უარყო.