ეკონომიკის მინისტრის, ნათია თურნავას განცხადებით, ოპოზიცია ცდილობს, რომ სოციალური და ეკონომიკური პრობლემების ფონზე, "მღვრიე წყალში თევზი დაიჭიროს" და მოქალაქეებს ამბოხისკენ მოუწოდოს. მისი თქმით, ხელისუფლება ამას არ დაუშვებს.

"არის ძალიან გამოხატული რადიკალური დესტრუქციული ოპოზიციის დაჯუფება, რომლის გზაც არ არის ევოლუციური, არ არის არჩევნები და ეს გზა არის იმედი იმისა, რომ მიეცემათ საშუალება, სოციალური თუ ეკომონიკური პრობლემების ფონზე, მღვრიე წყალში დაიჭირონ თევზი და მოუწოდონ მოქალაქეებს ამბოხისკენ და ქუჩის გზისკენ. ჯერ ერთი, ნებისმიერი რევოლუცია, ამბოხი თუ დესტაბილიზაცია იქნება მომაკვდინებელი ჩვენი ეკონომიკისა და ზოგადად, ქვეყნისთვის. ისევე, როგორც შინაგან საქმეთა მინისტრი ამბობს და ისევე, როგორც პრემიერმინისტრს არაერთხელ უთქვამს, ჩვენ ამას უბრალოდ არ დავუშვებთ", — განაცხადა თურნავამ.

თურნავამ აღნიშნა, რომ მოსახლეობას შეიძლება ამ ნაწილში ხელისუფლების იმედი ჰქონდეს, რადგან მისი თქმით, "არავითარი მშვიდობიანი ევოლუციური გზიდან გადახვევა" არ იქნება. ეკონომიკის მინისტრის მტკიცებით, ქართული ოცნება ის პოლიტიკური ძალაა, რომელმაც მშვიდობა, ევოლუციური განვითარება და პროგრესი მოიტანა, ამიტომ მათ მიზანს "რევოლუციური ამბოხებით" ქვეყნის უკან გადაგდება არ წარმოადგენს.

23 იანვარს გირჩი — მეტი თავისუფლების ლიდერმა, ზურაბ ჯაფარიძემ განაცხადა, რომ რევოლუციური სცენარისთვის ემზადება. მისი თქმით, ეს არ ნიშნავს, რომ "თოხებითა და ნაჯახებით გამოვა ხალხი", მაგრამ მმართველი გუნდი ძალაუფლებას არ დათმობს, რევოლუციაც არის ერთ-ერთი გზა. რევოლუციურ გეგმებზე საუბრობს ოპოზიციის რამდენიმე სხვა წარმომადგენელიც.