დეკანოზი თადეოზ სარალიძე საკვირაო ქადაგებაზე ირწმუნება, რომ რადგან "ამ მოწამლულ ქვეყანაში" ჭიათურაში, მაღაროელებს "ემსახურება", თვეში ერთხელ 1 000 ევრო უნდა "ჩაუდონ" ჯიბეში. გარდა ამისა, სასულიერო პირის მტკიცებით, ქვეყანაში ჯერ არშემოსული ვაქცინით ემუქრებიან და თუ არ გაიკეთებს, პენსიას მოუხსნიან, რომელიც, მისი თქმით, საერთოდ არ უნდა სჭირდებოდეს.

"ახლა უკვე მუქარები დაიწყეს, არ გაიკეთებ აცრას, პენსიას მოგიხსნი. ჯერ რა პენსიაა? მათხოვრული პენსია, მომიხსნან და თავი ურტყან კედელზე და სოციალურს მოგიხსნი. ქართველს სოციალური უნდა სჭირდებოდეს, მე პენსია უნდა მჭირდებოდეს, კაცო? მე ინტერვიუც მაქვს მიცემული, რახან ჭიათურის მოქალაქე ვარ და აქ ვემსახურები მაღაროელებს და ამ სისტემას, ამ მოწამლულ ქვეყანას, 1 000 ევრო თვეში ერთხელ უნდა ჩამიდონ ჯიბეში. არ დამიმალია მე და მუშას რამდენი მისცეთ, მე ეს არ ვიცი-მეთქი", — აცხადებს დეკანოზი.

თადეოზ სარალიძე ანტისემიტური, არმენოფობიური გამონათქვამებითაც გამოირჩევა. 24 იანვრის ქადაგებისას მან, ასევე, ბავშვებზე თქვა, რომ მთავარია ისინი ეკლესიის ერთგულები და პატიოსნები იყვნენ, თუ არადა დეკანოზის თქმით, ჯობია "პატარა მოკვდეს და სასუფეველში წავიდეს".