თბილისის მერმა დავით ნარმანიამ განაცხადა, რომ გამწვანება იყო და არის მერიის ერთ-ერთი მთავარი პრიორიტეტი.

ნარმანიას თქმით, გასულ წელს, დედაქალაქის მასშტაბით, 180 000 ხე-მცენარე დაირგო, თბილისსა და მის შემოგარენში კი პირველად დაიწყო ნუშისა და ზეთისხილის ბაღების გაშენება.

"2014 წლიდან დღემდე, ჯამში 650 000-მდე ხე-მცენარეა დარგული და ამ მიმართულებით, მიმდინარე წელსაც საკმაოდ მასშტაბურ ღონისძიებებს განვახორციელებთ. აღსანიშნავია, რომ 2016 წლის განმავლობაში, მოეწყო 30 ახალი და რეაბილიტაცია ჩაუტარდა 249 სკვერს. მათ შორისაა იაპონური ბაღი, რომელიც იაპონური ხელოვნების თვალსაჩინო ნიმუში გახლავთ. გავამწვანეთ და კეთილმოვაწყვეთ თამარაშვილის ქუჩის გზაგამყოფი ხეივანი.

მნიშვნელოვანი გამწვანებითი ღონისძიებები ჩატარდა ე.წ. ახალ გზაზეც, სადაც მიუხედავად ათასგვარი წინასწარი ვერსიისა, ნერგების უმრავლესობამ გაიხარა, ხოლო გამხმარი ნაწილი კონტრაქტორი კომპანიის მიერ ახლით ჩანაცვლდა. ასევე გავაკეთეთ საფეხმავლო ბილიკი ლისის ტბის ირგვლივ" - განაცხადა თბილისის მერმა.

ნარმანია აცხადებს, რომ მწვანე სივრცეების შექმნის პროცესი 2017 წელსაც გაგრძელდება.

2014 წელს, თბილისის მერის არჩევამდე, დავით ნარმანიას ერთ-ერთი წინასაარჩევნო დაპირება მილიონი ხის დარგვა იყო.

თბილისის მერიის მიერ მოწყობილი 15 სკვერის ფოტოები.