საზოგადოებრივი ტრანსპორტის აღდგენისა და ე.წ. კომენდანტის საათის გაუქმების მოთხოვნით მთავრობს კანცელარიასთან აქცია გაიმართა.

"ტრანსპორტი ყველას, ჯანდაცვა ყველას, განათლება ყველას", — სკანდირებდნენ აქციის მონაწილეები.

ფოტო: ანანო მუშკუდიანი

"მე მქონდა მწირი სამუშაო. 400 ლარიანი ხელფასი, ნახევარი ბანკში რომ უნდა დატოვო. ოჯახები რომ არ მეხმარებოდნენ, მე ახლა აქაც ვერ მოვიდოდი. აქ მოსასვლელი ფულიც არ მქონდა", — განაცხადა აქციის ერთ-ერთმა მონაწილემ.

ფოტო: ანანო მუშკუდიანი

"მთავრობამ კეთილი ინებოს, აიღოს მეტი პასუხისმგებლობა საკუთარ მოქალაქეებზე და იმის ნაცვლად, რომ უბრალოდ თავიდან აირიდოს ის მოვალეობა, რაც მას აქვს, იზრუნოს იმაზე, რომ არ გავრცელდეს ვირუსი და ამავდროულად არსებობდეს საზოგადოებრივი ტრანსპორტი. ისე, როგორც მოიქცა უამრავი ქვეყანა და ამის უამრავი გამოცდილება დაგვროვდა უკვე. არის მაგალითი, როდესაც ტრანსპორტის რაოდენობა გაიზარდა, რომ ბევრი ადამიანი არ მოხვდეს ერთდროულად; არის შემთხვევები, როდესაც ნახევარის შევსება არის მხოლოდ შესაძლებელი", — ამბობს On.ge-სთან საუბარში აქციის ერთ-ერთი მონაწილე.

აქციაზე იმყოფებოდა მოძრაობა ხალხისთვის ლიდერი, ანა დოლიძე. ქვეყანა უნდა გაიხსნას — ეს არის ანა დოლიძის მთავარი მოთხოვნა.

ფოტო: ანანო მუშკუდიანი / On.ge

"ფაქტია, რომ ეს თემა ადარდებს ყველა სეგმენტს, ჩვენი საზოგადოების და ფაქტია, რომ საზოგადოებაში არის კონსენსუსი — ქვეყანა უნდა გაიხსნას. პირველ რიგში ეს ეხება ტრანსპორტს, ეს ეხება განათლების სისტემას, ეს ეხება მთის კურორტებს, რომელთაც ერთი თვეღა დარჩათ, რომ რაღაცა საჭმელი ჭამონ მთელი წელი, ეს ეხება სარესტორნო ქსელებს და ჩვენი მოთხოვნაა, რომ ყველაფერი მოხდეს გონივრულად", — განაცხადა ანა დოლიძემ.

კორონავისრუსის გამო დაწესებული შეზღუდვების მოხნსნის მოთხოვნით, მთავრობის კანცელარიის გარდა დღეს აქციები გაიმართა პარლამენტთან და განათლების სამინისტროსთან.

22 იანვარს, საკოორდინაციო საბჭომ მიიღო გადაწყვეტილება, რომ ე.წ. წერტილოვანი შეზღუდვების ნაწილი რამდენიმე კვირით გახანგრძლივდება. კერძოდ, თბილისში მუნიციპალური ტრანსპორტის მუშაობა 1-ელ მარტამდე არ აღდგება. 1-ელ მარტამდე რჩება ძალაში ე.წ. კომენდანტის საათიც.