მთის კურორტების გახსნის მოთხოვნით ტურიზმის ინდუსტრიის წარმომადგენლები პრემიერმინისტრთან შეხვედრას ითხოვენ. გუდაურში არსებული ბიზნესების წარმომადგენლების თქმით, მათ მიმართეს მთავრობას თავიანთ სექტორში არსებული პრობლემებით, თუმცა აქამდე შედეგი არ დამდგარა.

"გუდაურში ტურისტი ისე არ ავა თუ მან არ ისრიალა, განსხვავებით ბაკურიანისგან, ამიტომ, რა თქმა უნდა, ამ საკითხებით ჩვენ მივმართავდით. გაიმართა პარლამენტის დარგობრივ კომიტეტში შეხვედრა სხვადასხვა კიდევ მრავალ რგოლში, მაგრამ, სამწუხაროდ, დღემდე არ მოჰყოლია არანირი რეაგირება. მინიმუმ ერთი კვირა მაინც სჭირდება, ამიტომ ეს დღეს, ხვალ, მაქსიმუმ ზეგ ეს საკითხი უნდა გადაწყდეს და ამიტომ ვითხოვთ ჩვენ პრემიერის ჩართულობას და პრემიერმინისტრთან შეხვედრას", — აცხადებს გიორგი სალუქვაძე დაიცავი მთის კურორტების დამფუძნებელი.

ინნ ჯგუფის მმართველის თქმით, კურორტზე არსებული ბიზნესების უმრავლესობა დაფინანსებულია ბანკის სესხებით, და ანტიკრიზისული გეგმით გათვალისწინებული საპროცენტო შეღავათი არ არის საკმარისი ძირი თანხის გადასახდელად.

"უმრავლესობა ბიზნესებისა საკურორტო ზონებზე არის ბანკის სესხით დაფინანსებული და მიუხედავად იმისა, რომ ბანკის პროცენტს სახელმწიფო აფინანსებს, თანადაფინანსების პროექტში საკმარისი არ არის იმისთვის, რომ გადაიხადო ძირი თანხა და აუცილებელია შემოსავალი გქონდეს. გარდა იმისა, რომ ბიზნესებს უჭირს, თვითონ ხალხი, რომელიც იყო დასაქმებული ამ ბიზნესებში უბრალოდ არ ექნებათ შემოსავალი. როდესაც გათავდება ეს 200-ლარიანი დახმარება მერე რას აპირებს სახელმწიფო უბრალოდ არ ვიცით", — აცხადებს ირაკლი კოკაია, ინნ ჯგუფის მმართველი.

ბიზნესის სფეროს წარმომადგენლების თქმით, მესამე სეზონია, რაც გუდაურის კურორტი ვერ ფუნქციონირებს და შესაბამისად ბიზნესმენებს არ აქვთ შესაძლებლობა ბიუჯეტის გენერირების.

კორონავირუსული პანდემიის გამო, ქვეყანაში სხვადასხვა შეზღუდვები მოქმედებს.

24 დეკემბრიდან ძალაში რჩება მუნიციპალური ტრანსპორტის შეზღუდვა დიდ ქალაქებში — თბილისში, ბათუმში, ქუთაისში, რუსთავში, გორში, ფოთში, ზუგდიდსა და თელავში. ასევე, შეზღუდვები რჩება საქალაქთაშორისო ტრანსპორტთან დაკავშირებით. არ გაიხსნება ბაზრობები და იმუშავებენ მხოლოდ აგრარული ბაზრობები. არ იხსნება, ასევე, ზამთრის კურორტებიც.