შვედი გარემოსდამცველი აქტივისტი, გრეტა თუნბერგი, დონალდ ტრამპის თეთრი სახლიდან წასვლას ტვიტერზე გამოეხმაურა.

"ძალიან ბედნიერ მოხუც კაცად გამოიყურება, რომელიც ნათელ და მშვენიერ მომავალს მოუთმენლად ელოდება. რა სასიამოვნო სანახავია", — წერს თუნბერგი.

სამწუხაროდ, ტრამპი პოსტს ვერ ნახავს, რადგან იანვრის დასაწყისში მას ტვიტერზე წვდომა სამუდამოდ შეეზღუდა.

თუნბერგის სარკაზმი, სავარაუდოდ, 2019 წელს, ტრამპის მიერ გაკეთებულ განცხადებას უკავშირდება, როცა ახალგაზრდა აქტივისტმა კლიმატის კრიზისის შესახებ გაეროში ისაუბრა, ტრამპმა კი აღნიშნა, რომ "იგი ძალიან ბედნიერ ახალგაზრდა გოგოდ გამოიყურება, რომელიც ნათელ და მშვენიერ მომავალს ელოდება". პრეზიდენტის შეფასება გრეტამ მაშინ ტვიტერის საკუთარი ანგარიშის აღწერაშიც დაამატა.

ეს პირველი შემთხვევა არაა, როცა თუნბერგი ტრამპის თავს გადახდენილ ამბებს მისივე რეპლიკებით ეხმაურება. გასული წლის ნოემბერში, როცა დონალდი "ხმების გაყალბებას" აპროტესტებდა, გრეტამ უპასუხა: "დამშვიდდი, დონალდ". ამით იგი ტრამპის 2019 წელს გავრცელებულ განცხადებას გამოეხმაურა, როცა მან აქტივისტს დამშვიდებისაკენ მოუწოდა და ურჩია, "ბრაზის მართვის პრობლემა" მოეგვარებინა.

აღსანიშნავია, რომ ტრამპი კლიმატის პრობლემების მიმართ სკეპტიკურად იყო განწყობილი, რის გამოც აშშ-ს პარიზის კლიმატის შეთანხმებაც კი დაატოვებინა. თუმცა წინასაარჩევნო კამპანიის დროს, ჯო ბაიდენმა პირობა დადო, რომ მისი გაპრეზიდენტების შემთხვევაში ქვეყანა კვლავ შეუერთდება საერთაშორისო პაქტს.