ქუთაისის საქალაქო სასამართლო მარიხუანის შენახვა-მოხმარებისთვის ლაშა კოღუაშვილის, ბექა გედენიძისა და ბესიკ ბაბუხადიას საქმეზე განაჩენს 16 თებერვალს გამოაცხადებს. სასამართლომ მათ შესახებ დღეს იმსჯელა, სხდომა რამდენიმე წუთის წინ დასრულდა. ამის შესახებ On.ge-ს ახალმა პოლიტიკურმა ცენტრმა - გირჩმა აცნობა. სასამართლოს პრესსამსახურში კი, პერსონალური მონაცემების დაცვის მიზნით, სხდომასთან დაკავშირებით არ საუბრობენ,

გირჩის პრესსამსახურში კოღუაშვილის და ბაბუხადიას მონაყოლზე დაყრდნობით აცხადებენ, რომ ბრალდებულებს 2016 წლის ზაფხულში, პოლიცია ჩხრეკის ორდერის გარეშე შევიდა მათ საცხოვრებელ სახლში და 13 გრამი ნედლი მარიხუანა აღმოუჩინეს.

კოღუაშვილის და ბაბუხადიას გამოძიება სისხლის სამართლის კოდექსის 260-ე და 273-ე მუხლის დარღვევას ედავება, გედენიძეს კი - მხოლოდ 273-ე მუხლს. 260-ე მუხლის მიხედვით, ნარკოტიკული საშუალების, მისი ანალოგის ან პრეკურსორის უკანონო დამზადება, წარმოება, შეძენა, შენახვა, გადაზიდვა ან გადაგზავნა ისჯება თავისუფლების აღკვეთით ვადით ექვს წლამდე. 273-ე მუხლით კი, იმავე ნივთიერებების პირადი მოხმარებისათვის მცირე ოდენობით უკანონო დამზადება, შეძენა, შენახვა ანდა ექიმის დანიშნულების გარეშე უკანონოდ მოხმარება, ჩადენილი ასეთი ქმედებისათვის ადმინისტრაციულსახდელშეფარდებული ან ამ დანაშაულისათვის ნასამართლევი პირის მიერ ისჯება ჯარიმით ან საზოგადოებისათვის სასარგებლო შრომით ას ოციდან ას ოთხმოც საათამდე, ანდა თავისუფლების აღკვეთით ვადით ერთ წლამდე.

„სისხლის სამართლის კოდექსის იმ დანართშიც, სადაც განსაზღვრულია ნარკოტიკული ნივთიერებების რაოდენობა და დოზები, მითითებულია, რომ ერთი გრამი მშრალი მარიხუანის ეკვივალენტია 2 გრამი ნედლი მარიხუანა, რადგანაც მათ შორის განსხვავება მხოლოდ ისაა, რომ ნედლ მარიხუანაში მეტი რაოდენობის წყალია. შსს კი, ბოროტად სარგებლობს იმით, რომ თითქოს საკონსტიტუციო სასამართლოს გადაწყვეტილება მხოლოდ გამომშრალ მარიხუანას ეხება და ადამიანებს ჯერაც აპატიმრებს მარიხუანის პირადი მოხმარებისთვის ქონის გამო,” - აღნიშნავენ გირჩში.

საქართველოს საკონსტიტუციო სასამართლოს გადაწყვეტილებით, პირადი მოხმარების მიზნით 70 გრამამდე გამომშრალი მარიხუანის შენახვისთვის პირი თავისუფლების აღკვეთით არ შეიძლება დაისაჯოს.