თეოლოგთა ნაწილი მათ მიერ გამოქვეყნებულ საშობაო ეპისტოლეში წარმოდგენილ საკითხებთან დაკავშირებით ქუთასი-გაენათის მიტროპოლიტ იოანეს საჯარო დებატებში იწვევს. ისინი ამბობენ, რომ არ აქვთ მიტროპოლიტის ადეკვატური რეაგირებს იმედი, რადგან ფიქრობენ, რომ მას "კრიტიკა უფრო მეტად აჯიუტებს".

"თქვენი ქმედებებიდან ვრწმუნნდებით, რომ კრიტიკა არათუ გრგებთ და რეფლექსიის საშუალებას გაძლევთ, არამედ კიდევ უფრო მეტად გაჯიუტებთ და ჩვენც იმედგაცრუებულებს გვტოვებს, რათა აქამდე არ დავყევით ბიბლიურ შეგონებას თქვენთან ოპონირების გზაზე — "რეგვენი სანაყავში რომც ნაყო, სირეგვნე მაინც არ მოსცილდება", — ვკითხულობთ თეოლოგების მიერ გავრცელებულ განცხადებაში.

თეოლოგები მიტროპოლიტს კონფორმისტსა და რუსოფობს უწოდებენ და ამბობენ, რომ არ უკვირთ, თუ სასულიერო პირი ვერ ჩასწვდა მათ მიერ გამოქვეყნებული ეპისტოლეს შინაარსს.

"მიგვაჩნია, რომ თქვენზე სამარცხვინო, ნეოსადუკეველი, კოლაბორაციონისტი და რენეგატი მმართველი არასდროს ჰყოლია ქუთაის-გაენათის კათედრას, რომელზედაც თავის დროზე ბრწყინავდნენ თქვენგან შეყვარებულ რუსთაგან დევნილნი და წამებულნი: წმ. დოსითეოზ ქუთათელი, წმ. ექვთიმე გაენათელი და წმ. გაბრიელი (ქიქოძე)! დიახ, სწორედ თქვენისთანებზე სჩიოდა ნეტარი იერონიმე: "ყველა ეპისკოპოსი არ არის ჭეშმარიტი ეპისკოპოსი. გახსოვდეს, რომ მოციქული იყო როგორც პეტრე ასევე იუდაც. საეკლესიო ხარისხი ადამაინს არ აქცევს ნამდვილ ქრისტიანად", — ვკითხულობთ განცხადებაში.

როგორც საპასუხო წერილშია აღნიშნული, მათ რცხვენიათ, რომ თბილისის სასულიერო სემინარიასა და აკადემიაში მიტროპოლიტი ოდესღაც მათი პედაგოგი იყო.

"ისღა დაგვრჩენია, ერთხმად შემოგძახოთ: ანაქსიოს! ანაქსიოს! ანაქსიოს!", — აცხადებენ ისინი.

განცხადებას ხელს აწერენ თეოლოგები თეოლოგები — ზვიად ცაბაძე, გიორგი ტიგინაშვილი, ვლადი ნარსია, გოჩა ბარნოვი, გურამ ლურსმანაშვილი, ვანო შოშიაშვილი, მიხეილ ნებიერიძე, დავით ნებიერიძე, გიორგი გეგუჩაძე, რატი ბიგანიშვილი, გურამ პაპავა, გოგა ესიავა და ეკლესიის ისტორიის მკვლევარები — ბექა ჭიჭინაძე და შოთა მათითაშვილი.

პოლემიკა სასულიერო პირსა და თეოლოგებს შორის მას შემდეგ დაიწყო, რაც ამ უკანასკნელებმა კრიტიკული "საშობაო ეპისტოლე" გამოაქვეყნეს. აღნიშნულ ეპისტოლეში მათ საპატრიარქოსა და პატრიარქის ქმედებები გააკრიტიკეს. ეპისტოლეს შეფასებისას მიტროპოლიტმა იოანემ მათ წარმართები უწოდა და განაცხადა, რომ სასულიერო განათლებას, რომლის მიღების უფლება პატრიარქისგან მიეცათ, საპატრიარქოსთვის ქვებისა და ტალახის სასროლად იყენებენ.

მიტროპოლიტის მიერ მათი "საშობაო ეპისტოლეს" შეფასებისას გაკეთებული ბრალდებების საპასუხოდ, თეოლოგებმა მისთვის საეკლესიო სასამართლოს დანიშვნა მოითხოვეს. თეოლოგების პასუხის პასუხს ფეისბუქ პოსტით უპასუხა ქუთაის-გაენათელმა მიტოროპიტმა და დაწერა რომ "ვიღაც თეოლოგების" მოთხოვნამ ბოლშევიკური რეჟიმი გაახსენა. მათ თეოლოგების "გამოცდა" გადაწყვიტა და განაცხადა, რომ მათთან საუბარს მხოლოდ მას შემდეგ გააგრძელებდა, თუ ისინი მის მიერ დასმული ორი კითხვიდან, ერთ-ერთს მაინც უპასუხებდნენ.

გაიგეთ მეტი: