ნაციონალური მოძრაობის ერთ-ერთი ლიდერის, ხატია დეკანოიძის თქმით, რიგგარეშე არჩევნების ვადებზე მსჯელობა შეიძლება, მაგრამ მნიშვნელოვანია ოპოზიციის ერთობა. ამის შესახებ მან ფორმულას ეთერში განაცხადა.

"ხელისუფლება უნდა მოვიდეს კონკრეტული წინადადებებით, კონკრეტული გეგმით, როგორ გეგმავს ოპოზიციის 4 მოთხოვნის დაკმაყოფილებას. მათ შორის ვადებზეც შეიძლება საუბარი. ჩვენ ყველაფერი უნდა გავაკეთოთ იმისთვის რომ თუ რაიმე ინიციატივით გავდივართ თუ რაიმე ახალ კომპრომისულ სიტუაციას ვუმატებთ ამ ყველაფერს, ეს უნდა იყოს ოპოზიციაში განხილული და ძალიან უნდა გავუფრთხილდეთ ოპოზიციურ ერთობას. რა თქმა უნდა ყველას აქვს უფლება პოლიტიკური კრიზის მოგვარების გზებზე ისაუბროს, მაგრამ ამ ერთობას ძალიან უნდა გავუფრთხიდლეთ, ამიტომ ვისურვებდი, ყველას ჰქონდეს ის პასუხისმგებლობა გრძნობა, რომელიც აუცილებელია ოპოზიციური ერთობის შესანარჩუნებლად", — ამბობს დეკანოიძე.

მე-10 მოწვევის პარლამენტმა ოფიციალურად მუშაობა 11 დეკემბერს დაიწყო. პარალელურად კი, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროექტს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.