დაავადებათა კონტროლის ეროვნული ცენტრის ხელმძღვანელის, ამირან გამყრელიძის თქმით, კორონავირუსის ახალ შტამზე საქართველოში ერთ შემთხვევაზე მიმდინარეობს კვლევა. ამასთან, გამყრელიძის თქმით, კიდევ ორი ნიმუშია საეჭვო. ამის შესახებ მან TV პირველის ეთერში ისაუბრა.

"გენომის სეკვენირება დაიწყო ერთზე და ორი არის კიდევ საეჭვო, სადაც ვეძებთ იმათ ნიმუშებს ხელმეორედ, ანუ იმ ადამიანების, ხელმეორედ უნდა იქნეს აღებული, რადგან პირველად ნიმუშში ეჭვი არის. აიღება ნიმუშები ხელმეორედ და კიდევ ორზე დაიწყება ეს კვლევა. ლუგარის ლაბორატორიის შესაბამის დეპარტამენტს უკვე აქვს დავალება მიღებული, რომ შესაბამისი პროტოკოლი გაკეთდეს, რანდომულად რომელ ჯგუფებზე ჩატარდეს ეს კვლევები, რადგან ეს გენომის სეკვნირება არ არის ყოველდღიური კვლევა და საკმაოდ ძვირი სიამოვნებაცაა, როდესაც გენს მთლიანად შიფრავ",— განაცხადა მან.

მისივე თქმით, სეკვენირების დასრულებას, დაახლოებით, 4-5 დღე სჭირდება, ამიტომ ზუსტი პასუხი დადასტურდება თუ არა კორონავირუსის ახალი ვარიანტი საქართველოშიც, მომავალ კვირას ეცოდინებათ.

14 დეკემბერს ინგლისში კორონავირუსის ახალი ვარიანტი დააფიქსირეს. ჯანდაცვის სფეროს წარმომადგენლები აცხადებენ, რომ კორონავირუსის ახალი შტამი 70%-ით უფრო გადამდებია, მაგრამ არაა დამტკიცებული არის თუ არა უფრო მომაკვდინებელი. რამდენიმე ქვეყანამ კორონავირუსის მუტაციური ვარიანტის გამო ბრიტანეთთან საჰაერო მიმოსვლა შეაჩერა.

ამასთან, ჯანმრთელობის მსოფლიო ორგანიზაციის (WHO) ევროპის რეგიონული ოფისის დირექტორის, ჰანს კლუგეს განცხადებით, კორონავირუსის ახალი ვარიანტი უკვე ევროპის 8 ქვეყანაში დაფიქსირდა.

21 დეკემბერს კი, საქართველოში ბრიტანეთიდან შემოსული, ან ბოლო 2 კვირაში ბრიტანეთში ნამყოფი პირებისთვის სავალდებულო კარანტინი დაწესდა