ევროპული საქართველოს ერთ-ერთი ლიდერის დავით ბაქრაძის თქმით, ახლა პარლამენტში შესვლა მორალური დეგრადაციაა და ამისთვის ელისაშვილიც კი ეცოდება.

"ამ ერთპარტიულ პარლამენტში შესვლა ისეთი მორალური დეგრადაციაა, ელისაშვილიც კი მეცოდება ამისთვის, ვურჩევ, დაფიქრდეს", — ამბობს ბაქრაძე.

31 ოქტომბერს გამართული საპარლამენტო არჩევნების შედეგებს ოპოზიცია არ აღიარებს. მათ უარი თქვეს მეორე ტურში მონაწილეობაზე და არ აპირებენ პარლამენტში შესვლას. პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიციურ პარტიებს შორის მოლაპარაკებები მიმდინარეობს. ოპოზიცია მოითხოვს ჩატარდეს რიგგარეშე არჩევნები, გათავისუფლდნენ პოლიტპატიმრები და გადადგეს ცენტრალური საარჩევნო კომისიის თავმჯდომარე, თამარ ჟვანია. ქართულ ოცნებაში ამბობენ, რომ რიგგარეშე არჩევნების ჩატარების საკითხი არ განიხილება.

საქართველოს მე-10 მოწვევის პარლამენტი, რომელსაც ოპოზიცია ლეგიტიმურად არ სცნობს, 11 დეკემბერს შეიკრიბა. ერთპარტიულმა პარლამენტმა უკვე დაამტკიცა მთავრობის აპარატი. მმართველ პარტიასა და ოპოზიციას შორის კი, მოლაპარაკებები გრძელდება და საზოგადოება კვლავ მე-5 რაუნდის მოლოდინშია. მხარეები არ აზუსტებენ როდის გაიმართება მორიგი შეხვედრა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში – რა ხდება პარლამენტში.