ლეიბორისტული პარტიის ლიდერის, შალვა ნათელაშვილის განცხადებით, პარტიამ სახელმწიფო ბიუჯეტს უკან გადაურიცხა 67 ათასი ლარი, რომლებიც უბნებზე ხელფასების სახით უნდა გაეცათ. იგი მოითხოვს, რომ ეს თანხა უფასო სასადილოს ბენეფიციარების გამოკვებას მოხმარდეს. ამის შესახებ მან პარტიაში გამართულ ბრიფინგზე ისაუბრა.

"უკან გადავურიცხეთ 67 ათასი ლარი, რომელიც უნდა გაგვეცა ე.წ. ხელფასებისთვის ნულოვან უბნებზე, ანუ უბნებზე, სადაც რეჟიმმა გაგვიყალბა არჩევნები ურცხვად, არ დაგვიწერა არცერთი ხმა ან ჩვენმა წარმომადგენლებმა გვიღალატეს. მე მოვითხოვ, ეს 67 ათასი ლარი დაიხარჯოს უფასო სასადილოს ბენეფიციარების გამოკვებაზე, რომლებიც წლებია ქრონიკულად შიმშილობენ", — განაცხადა ნათელაშვილმა.

25 დეკემბერს ცნობილი გახდა, რომ ოპოზიციის რამდენიმე წევრს პარლამენტის დეპუტატის ხელფასი ჩაერიცხა. რადგან ოპოზიციას მანდატებზე უარი აქვს ნათქვამი და საპარლამენტო საქმიანობაში ჩართული არ არის, ხელფასის საკითხი განხილვისა და კრიტიკის თემა გახდა, რასაც პარლამენტში პროცედურებით ხსნიან.

როგორც პარლამენტში განმარტავენ, მიუხედავად იმისა, რომ მათ პარლამენტს უკვე მიმართეს მანდატების გაუქმების მოთხოვნით, ოფიციალურად, ჯერ კიდევ დეპუტატები არიან. ამიტომ, დაერიცხათ შესაბამისი ანაზღაურება.