ქართული ოცნების აღმასრულებელი მდივნის, ირაკლი კობახიძის განცხადებით, მმართველ პარტიას ოპოზიციასთან მოლაპარაკების პროცესში ლავირების დიდი სივრცე აქვს, ოპოზიციის რესურსი კი შეზღუდულია. POSTV-ის ეთერში კობახიძემ განაცხადა, რომ ოპოზიციურ პარტიებს ახლა არჩევანი აქვთ ცუდსა და უარეს შორის.

"მათ აქვთ რეალურად ორი სვლა: ერთი — ცუდი, მეორე — უარესი. ცუდი მათთვის არის უკვე შემოსვლა პარლამენტში. იმდენი ილაპარაკეს, რომ ახლა უწევთ საკუთარი ნათქვამის გადათქმა და პოლიტიკურად ეს, რა თქმა უნდა, მძიმეა. ეს არის ცუდი, ანუ შემოსვლა პარლამენტში, მაგრამ, უარესი მათთვის, არის არშემოსვლა. ფაქტობრივად, ამით ისინი მთლიანად ანადგურებენ საკუთარ პოლიტიკურ შანსებს და საკუთარ პარტიას", — განაცხადა კობახიძემ POSTV-ის ეთერში.

31 ოქტომბერს ჩატარებული საპარლამენტო არჩევნების შედეგებს ოპოზიცია არ აღიარებს. მათ არ მიიღეს მონაწილეობა მაჟორიტარული ოლქების მეორე ტურში და პროპორციული სიით მიღებულ მანდატებზეც უარს ამბობენ.

11 დეკემბერს მე-10 მოწვევის პარლამენტის პირველი სხდომა ჩატარდა, რომელსაც მხოლოდ ქართული ოცნება ესწრებოდა. 24 დეკემბერს ერთპარტიულმა პარლამენტმა საქართველოს მთავრობა დაამტკიცა.

პოლიტიკური კრიზისიდან გამოსასვლელად მმართველ პარტიასა და ოპოზიციას შორის მოლაპარაკებები აშშ-სა და ევროკავშირს ელჩების შუამავლობით მიმდინარეობს. უკვე ჩატარდა მოლაპარაკების ოთხი რაუნდი. კობახიძე ვარაუდობს, რომ მომდევნო რაუნდი იანვრის შუა რიცხვებში ჩატარდება.