ქართული ოცნების ერთ-ერთი ლიდერის, მამუკა მდინარაძის განცხადებით, 21 და 22 დეკემბერს გამართულ კომიტეტების მოსმენაზე მინისტრობის კანდიდატებს კრიტიკული შეკითხვებიც დაუსვეს. მდინარაძის თქმით, იყო საგნობრივი დისკუსია და სიღრმისეული საუბრები.

"გუშინ და გუშინწინ კომიტეტების მოსმენა გვქონდა, სადაც დეტალურად, საგნობრივად ბევრი თემა გავიარეთ. დაისვა 200-ზე მეტი შეკითხვა და იყო კრიტიკაც, იყო დისკუსიაც, ისეთი საგნობრივი, სიღრმისეული საუბრები, კითხვები და პასუხები და ამისი საშუალება მოგვეცემა ხვალაც", — განაცხადა მდინარაძემ.

22 დეკემბერს პარლამენტში მინისტრობის კანდიდატებს უსმენდნენ. ოფიციალურად პარლამენტმა მუშაობა 11 დეკემბერს დაიწყო. ამის პარალელურად, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროეტქს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში – რა ხდება პარლამენტში.