"60 ოპოზიციონერი რომ იჯდეს ახლა იქ, ბუნდღა ხომ არ დარჩებოდა იმ მინისტრების", — ასე გამოეხმაურა პარტია მოქალაქეების ლიდერი, ალეკო ელისაშვილი პარლამენტში მინისტრობის კანდიდატების მოსმენას.

"კარგი სპორტსმენი, კარგი მუსიკოსი, კარგი მსახიობი არ ნიშნავს იმას, რომ ის აუცილებლად იქნება კარგი პოლიტიკოსი. ყოველდღე რეებს იძახის ეს ქალი [ელისო ბოლქვაძე]. დღესაც რა თქვა, რომ ბეთჰოვენი და მოცარტი უნდა ვასწავლოთ სკოლაშიო. საერთოდ რაებს იძახდნენ იმ მინისტრების დამტკიცების დროს", — აღნიშნა ელისაშვილმა TV პირველის ეთერში.

ბოლო ორი დღის განმავლობაში პარლამენტის კომიტეტები მინისტრობის კანდიდატებს უსმენენ. ერთპარტიულ სხდომებზე, რომელსაც მხოლოდ ქართული ოცნების დეპუტატები ესწრებოდნენ მინისტრობის ყველა კანდიდატს მხარი დაუჭირეს.

ოფიციალურად პარლამენტმა მუშაობა 11 დეკემბერს დაიწყო. ამის პარალელურად, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროეტქს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.